Një ngjarje e pazakontë ka ndodhur në ndeshjen Brazil-Argjentinë në “Arena Corinthias” të Sao Paulos. Autoritetet shëndetësore braziliane hynë në fushë për të nxjerrë nga stadiumi 4 lojtarë argjentinas vetëm 5 minuta pasi kishte nisur ndeshja, të cilët nuk kishin kryer karantinimin pasi hynë në vend nga Anglia.
Lidhur me këtë ngjarje ka reaguar FIFA.Organi drejtues i futbollit botëror publikoi një komunikatë, duke bërë me dije se do të analizojë faktet dhe do të mendojë ndëshkime të mundshme për përgjegjësit e asaj që ndodhi.
“FIFA është e keqardhur për skenat që u panë në ndeshjen Brazil-Argjentinë dhe që çuan në pezullimin e saj, duke mos lejuar miliona tifozë në të gjithë botën që të shikonin përballjen mes dy prej kombëtareve më me peshë të futbollit botëror. FIFA ka marrë informacionet e para dhe organet e saj disiplinore do t’i analizojnë ato për të marrë vendimet përkatëse”,- lexohet në komunikatë./ Opinion.al
