FIFA ka dënuar Federatën Serbe të Futbollit, për sjellje të gabuar në ndeshjen e fundit ndaj Andorrës, ku triumfuan 3-0.
Organi më i lartë i futbollit, ka vendosur një gjobë prej 54 mijë eurosh, ndërsa për ndeshjen e radhës ndaj Anglisë, do të mbyllet 15% e stadiumit. Serbia nuk do të ketë 8100 tifozët pas porte ndaj anglezëve. Por nuk përfundon këtu. Në rast se incidentet përsëriten nga tifozët, atëherë mund të ketë një vendim më të rëndë.
Në Serbi, shkruajnë në FIFA mund të japë dënimin që ndeshja ndaj Shqipërisë, e planifikuar më 11 tetor, të luhet pa tifozë. Kjo e shton presionin te serbët, që duhet të ruajnë qetësinë ndaj Anglisë, pasi çdo veprim i gabuar, mund të rezultojë fatal. /tvklan.al
