Fieri, Divjaka dhe Pogradeci kanë çelur sezonin turistik veror, duke iu bashkuar kështu pjesës tjetër të zonave që e presin qershorin gati.
“Festa e Valëve” ishte motoja në Fier, aty ku në bregdetin e Derëzezës, u mblodhën dhjetëra pjesëmarrës, të cilët ndoqën nga afër koncertin e larmishëm artistik me këngë e valle.
Rëra e pastër dhe deti i cekët janë arsyet që turistët vizitojnë Darëzezën.
“Më pëlqen shumë Shqipëria, njerëzit janë shumë mikpritës dhe të ngrohtë. Mendoj që këtu do të pensionohem dhe do të jetoj deri në fund të jetës”, tha një pushues.
Kryebashkiaku Armando Subashi, është shpresëplotë se këtë sezon veror vizitorët do dyfishohen.
Subashi pohon se 40% e sipërfaqes së rërës do të shfrytëzohet si hapësirë publike, ndërkohë që vijon puna për përmirësimin e infrastrukturës rrugore. Një traditë feste është kthyer edhe hapja zyrtare e sezonit turistik në Divjakë.
Divjaka vizitohet gjatë gjithë vitit nga turistë të shumtë përveç plazhit dhe rërës së pasur me jod ofron edhe natyrën e egër të Parkut Kombëtar dhe ecjet përgjatë pyllit me pisha.
Sipas kryetarit të Bashkisë Divjakë, pritet dyfishim i turistëve krahasuar në një vit më parë, ndërsa janë menduar një sërë lehtësish për vizitorët.
Aktivitete të larmishme artistike kulturore dhe sportive janë planifikuar edhe në Pogradec, aty ku nuk mungojnë të huajt si dhe vizitorët vendas.
“Unë vij nga Austria, në fakt jemi për të dytin vit radhazi në Shqipëri. Është një vend i mrekullueshëm, sidomos liqeni është fantastik. Na pëlqejnë malet që e rrethojnë qytetin dhe vet qyteti është shume i bukur, madje sot është një festival dhe ne po e shijojmë shumë”, tha një turist.
“Është një shtet shumë i bukur dhe në të vërtet na pëlqen mirësia e njerëzve këtu. Kemi provuar ushqimin dhe çdo gjë është shume e bukur. Ne do të qëndrojmë në Pogradec për dy ditë”, u shpreh një tjetër pushues.
Strukturat akomoduese në Pogradec dhe rrethina janë të rezervuara deri në vjeshtë,ndërsa pritet fluks ne rritje i vizitorëve të huaj. Bashkëpunimi mes operatorëve turistikë të juglindjes, por edhe me ata në Ohër dhe Strugë,pritet të sjellë impakt në rritjen e numrit të vizitorëve.
Pjesa më e madhe e hapësirave të plazheve publike, të cilat dominojnë në raport me ato private, do të menaxhohen nga bashkia, e cila do të vendosë çadra falas për pushuesit.
TV Klan
