Gruaja i vë flakën shtëpisë pas sherrit me të shoqin. Ngjarja ka ndodhur pasditen e së martës në fshatin Grecalli të Fierit.
Në momentin e zjarritm në banesën e Trifon Gjikës nuk ka pasur familjarë, ndërsa dyshohet se flakën ia vuri nusja e djalit të tij, Ardianit, për shkak të konflikteve në familje. Ajo është grindur më herët me bashkëshortin dhe vjehrrin.
Mësohet se Rudina Ismaili 37 vjeçe, një javë më parë ka patur sherr me të shoqin dhe është larguar për në Elbasan aty ku ka edhe prindërit e saj. Ditën e sotme, Ardiani ka shkuar dhe e ka bindur për ta marrë me vete. Ajo ka shkuar duke besuar se do të martoheshin, pasi bashkëjetonin prej kohësh. Sot, Ardjani i cili njihet si i alkoolizuar ka shkuar në shtëpi përsëri i dehur duke e bërë të shoqen të ndihet e pashpresë dhe në dëshpërim. Ajo ka pritur sa ka dalë ai nga shtëpia dhe rreth pasdites dyshohet ti ketë vënë flakën shtëpisë.
Ky është dyshimi i Ardianit dhe të atit të tij. Ata kanë lajmëruar policinë dhe zjarrfikësen. Pavarësisht mbërritjes së shpejtë të shërbimit zjarrfikës flakët përpinë gjithçka në pak minuta, duke shkrumbuar gjithë banesa me gjithçka që kishte brenda.
Policia ka shoqëruar edhe gruan 37-vjeçare për ta marrë në pyetje. Kjo e fundit, sipas burimeve, ka thënë se nuk e ka vënë ajo flakën edhe pse ka qenë e mërzitur me burrin. Ajo ka treguar se sapo ka dalë në oborr ka parë flakët të cilat mund të kenë ardhur si pasojë e ndonjë shkëndije elektrike.
Policia po vijon hetimet ndërsa pritet që e arrestuara të merret serish në pyetje ditën e nesërme.
Deklarata e bashkeshortit per zjarrin
