Qarku i Fierit, i cili për këto zgjedhje ka një rëndësi të madhe për shkak se vjen i dyti në radhë pas Tiranës për nga numri i lartë i mandateve, ka arritur të befasojë dhe vetë socialistët.
Në këtë qark, nga numërimi i deritanishëm, është arritur që Partia Socialiste të triumfojë me 12 mandate, 1 më shumë nga se ata vetë pretendonin se mund të merrnin, ndërkohë që Partia Demokratike ka marrë deri tani 4 mandate.
Gazetari Merin Maçi raporton se kanë mbetur rreth 59 kuti votimi pa u numëruar, e se ky proces pritet të përfundojë në orët në vijim, deri në pasditen e sotme. Sakaq, është duke u zhvilluar një pushim nga procesi i numërimit deri në orën 10:00. Po kështu gazetari raporton se 5166 vota janë vlerësuar si të pavlefshme, duke ngritur kështu shqetësime për të dyja forcat kryesore politike.
“Sa i përket procesit të numërimit, ky proces pritet të përfundojë rreth pasdites, kur do të bëhet dhe publikimi i të gjitha të dhënave të fundit sa i takon kutive të mbetura, ku do të shihet edhe numri total i votave që do sigurojnë subjektet elektorale në garë. Llogaritet që deri më tani PS të ketë marrë 51 mijë vota më shumë nga PD.
Nga i gjithë numërimi që është bërë, ka një numër të konsiderueshëm të votave të cilat janë të pavlefshme, rreth 5166 dhe kjo e dhënë ka qenë disi shqetësuese për dy shtabet elektorale pasi është një numër i konsiderueshëm votash të cilët mund të ndikonin në shpërndarjen e mandateve dhe për të partitë, në rast se do përkthehej në një votë të vlefshme”, raportoi gazetari Merin Maçi. Tv Klan
