Festimi me shqiponjë nga Xhaka dhe Shaqiri ka ndarë politikën nga bota e sportit në Zvicër. Teksa një pjesë e politikës e pranon por nuk e jutifikon gjestin, e gjithë pjesa tjetër e sportit duke filluar nga Federata e Futbollit tek Ministria e Sportit janë në mbështetje të dy futbollistëve. Presidenti i Federatës, Peter Gillieron ka deklaruar se me shumë mundësi kjo ngjarje do ta bashkojë më shumë kombin dhe ekipin.
Në stërvitjen e radhës, pas ndeshjes me Serbinë, trajneri Petkoviç ka biseduar nga afër me të dy lojtarët dhe nga fotot e publikuara në mediat zvicerane, duket qartë se ai i ka përqafuar futbollistët në shenjë mbështetjeje ndaj gjestit të tyre. Vladimir Petkoviç është boshnjak i natyralizuar zviceran dhe me shumë mundësi i kupton ndjenjat e futbollistëve me origjinë nga Kosova. Pozitiv ka qenë në deklaratat e tij edhe ministri i Sporteve Guy Parmelin që deklaroi se Zvicra është një vend me shumë gjuhë dhe kultura dhe që të gjithë bashkëjetojnë në mënyrë perfekte. “Festimi i lojtarëve është sipas dëshirës, ndjenjat e tyre janë të kuptueshme”.
Eksperti i integrimit Thomas Kessler, thotë se rëndësi kanë faktet dhe jo simbolet. Shqiptarët sipas tij në Zvicër janë besnikë ndaj këtij shteti dhe se kanë patur impakt pozitiv në ushtri, punë dhe tregëti. Gjërësisht në Zvicër komuniteti i shqiptarëve konsiderohet si kantoni i 27. Influenca e tyre ka bërë që Ministria e Arsimit të vendosë që dokumentet zyrtarë arsimorë veç gjermanishtes, frëngjishtes dhe italishtes të publikohen edhe në gjuhën shqipe.
E gjithë Zvicra është në mbrojtje të shqiptarëve edhe për faktin se sipas mediave vendase, provokimi ka ardhur fillimisht nga ish-ministri i Jashtëm serb Ivica Daçiç i cili raportohet të ketë thënë se “nuk dihet ndaj kujt do të luajmë, kundër kombëtares së Zvicrës, Shqipërisë apo asaj të Prishtinës”.
Tv Klan
