Festivali i Këngës, ja 24 emrat që konkurrojnë për në Eurovision

Festivali i Këngës në Radio-Televizionin Shqiptar shpalli mbrëmjen e djeshme 24 emrat e këngëtarëve pjesëmarrës në edicionin e 55-të të aktivitetit më të rëndësishëm të këngës shqiptare.

Mes tyre do të dalë fituesi që do të përfaqësojë Shqipërinë në Festivalin Europian, i cili do të mbahet në Kiev të Ukrainës. Mbizotërojnë emra të rinj këngëtarësh, ndërsa mes kompozitorëve shënojmë emra si Adi Hila, Vaso Tole, Sokol Marsi, Endri Sina, Klodian Qafoku, Genc Salihi. Gjejmë si krijuese edhe Marsela Çibukajn, ndërsa rikthehet Xhevdet Gashi nga Kosova. I rikthehen festivalit Linda Halimi, Flaka Krelani e Rezarta Smaja, shkruan Panorama.

STRUKTURA E FESTIVALIT

Me të tjerë drejtues dhe me një tjetër strukturë paraqitet ky edicion i sivjetshëm. Drejtor i Festivalit është Rezart Aga, ndërsa skenariste Melsi Qirici. Këngët e shpallura mbrëmë janë përzgjedhur mes gjithë prurjeve nga Shqipëria, Kosova e më gjerë, nga 5 producentë.

Ndryshe nga vitet e tjera, festivali nuk ka më vetëm një drejtor artistik, i cili duhet të mbante i vetëm përgjegjësinë e përzgjedhjes së këngëve, jo nga ai vetë, por nga një komision i zgjedhur me këtë rast, detyra e të cilit përfundonte pikërisht shpalljen e listës së konkurrentëve.

Tashmë ata janë 5 që ndajnë përgjegjësitë mes tyre, por sigurojnë më shumë transparencë në përzgjedhjen e këngëve pjesëmarrëse. Bëhet fjalë për kompozitorët Alfred Kaçinari, Shpëtim Saraçi, Gent Rushi, Florent Boshnjaku dhe Bojken Lako. Pesë personalitete të rëndësishme të muzikës shqiptare, me një karrierë të gjatë e të suksesshme e që lëvrojnë rryma të ndryshme muzikore.

Kjo do të thotë që në këtë festival do të mund të shohim larmi rrymash e stilesh muzikore. Edhe gjeografia e pjesëmarrësve është më e gjerë.

Jo se vitet e tjera ka pasur ndonjë kufizim për këngëtarët nga trojet shqiptare përtej kufijve shtetërorë, por këtë herë impenjimi është edhe më i madh. Pas prezantimit të formulës së re të festivalit në Tiranë, stafi organizator udhëtoi drejt Kosovës, e cila bëhet pjesë e këtij festivali, përmes kompozitorit ët suksesshëm Florent Boshnjaku.

Le të kujtojmë arritjen e tij në Festivalin Europian me këngën “Suus” kënduar nga Rona Nishliu, e cila u rendit në vend të pestë.

FORMULA E RE E VOTIMIT

Bashkë me mënyrën e përzgjedhjes së këngëve pjesëmarrëse ndryshon edhe mënyra e votimit. Këngët do të kalojnë në një sitë më të imët profesionistësh, ndërsa publiku thirret të bëhet pjesë e festivalit, duke pasur të drejtën e përzgjedhjes së finalistëve e më pas edhe të këngës fituese.

Prej 24 këngëve që do të prezantohen gjatë netëve të festivalit, vetëm 12 prej tyre do të mund të dalin në natën finale. Për herë të parë në Festivalin e Këngës do të aplikohet një mënyrë e re votimi.

Pas mbarimit të këngëve konkurruese do të jenë tri juri, që do të bëjnë përzgjedhjen e këngëve për në natën finale. Do të jetë juria profesioniste, e cila përzgjedh 6 këngë, juria e mediave, e cila zgjedh tri këngë, si edhe ajo e publikut.

Ky edicion rikthen televotimin, përmes të cilit do të zgjidhen tri këngë të tjera për në finale. Ndërsa në natën finale do të jetë një tjetër juri profesioniste. Në përbërje të saj nuk do të jenë anëtarët që përzgjodhën konkurrentët finalistë.

Kjo juri ka në dorë 60% të vlerës së votimit për këngën fituese, ndërsa publiku 40%.

LISTA E KONKURRENTEVE