Prej disa muajsh punonjësit e Bashkisë së Lezhës nuk marrin pagat. Siç kishte sqaruar më herët për Opinion.al, kryetari i Bashkisë së Lezhës, Fran Frrokaj shkak janë bërë borxhet e trashëguara në bashki. Por gjithsesi, ai kishte premtuar se problemi do të zgjidhet dhe deri më 10 Dhjetor dhe të gjithë do të merrnin 1 deri në 2 paga mujore. Por kjo s’ka ndodhur! Punonjës të kësaj bashkie që nuk deshën të identifikohen për shkak se u rrezikohet vendi i punës thanë se në dhjetor është shpërndarë nga një page vetëm për disa prej punonjësve. Këta janë kryesisht punëtorë të mirëmbajtjes apo të njësive administrative që normalisht kanë paga minimale. Po të tjerët? Administrata e bashkisë dhe institucionet e vartësisë?
Për të mësuar më shumë kontaktuam sërish z. Fran Frrokaj, kryebashkiakun e djathtë të Lezhës.
Ai iu përgjigj interesimit tonë, por tha se problemi qendron tek Thesari i Shtetit. “ Unë i kam dërguar shkresë Ministrisë së Financave dhe 2-3 SMS direkt ministrit Arben Ahmetaj”, u shpreh Frrokaj.
Po sipas sqarimit të tij, Thesari ka vënë kufizime për Nëntorin e Dhjetorin mbi sasinë e parave që mund të levrohen për Bashkinë e Lezhës. “Me 54 milionë lekë (të reja) shpërndava 1-2 paga si dhe bëra pagesa për siguracione dhe fatura shërbimesh. Më tej kërkova edhe 50 milionë të tjera, por Thesari lëvroi vetëm 15 milionë”, tha Frrokaj.
Sipas tij, pagat e prapambetura do të levrohen në Janar, por punonjësit e Bashkisë së Lezhës janë shpresëpak. “Për ne nuk ka festa, kemi muaj që jetojmë me borxhe”, shprehen ata të revoltuar për situatën kritike që u krijua me financat e bashkisë dhe që preku direkt edhe jetesën e tyre.
Sakaq Opinion.al ka kontaktuar edhe Ministrinë e Financave e cila fajëson Bashkinë për problemin e krijuar. Sipa ministrisë së drejtuar nga Arben Ahmetaj, kjo bashki do ti nënshtrohet kontrollit pasi është keqmenaxhuar.
*Bashkëngjitur reagimi i plotë i Ministrisë së Financave
Ministria e Finacave: Bashkia Lezhë e keqmenaxhuar
/Opinion.al
