Zjarrfikësit do të shpërblehen me një pagë mujore për festat e fundvitit, ndërsa ata që janë angazhuar në përballimin e situatës së zjarreve në verë do të kenë shpërblim dy paga shtesë. Lajmi është bërë i ditur nga ministri i Brendshëm Taulant Balla në përfundim të mbledhjes së qeverisë.
“Qeveria do të transferojë të gjithë bashkive të vendit fondin që para natës së Vitit të Ri. Zjarrfikësit që u angazhuan në zjarrin në verë në Greqi do të marrin 2 paga shpërblim”-tha Balla.
Edhe punonjësit e Policisë së Shtetit janë një prej kategorive që do të marrin shpërblim, pasi sipas Ballës kryejnë një punë të vështirë duke u përballur çdo ditë me krimin.
“Shpërblim për çdo pjesëmarrje në operacione dhe trajtim ushqimor, paratë për të cilin do t’u transferohen në bankë dhe do e tërheqin përmes një karte. Do të marrin 118 mijë lekë të reja para Vitit të Ri, vlera e trajtimit ushqimor. Brenda javës mbyllim marrëveshjen me disa supermarkete, punonjësit e policisë i marrin produktet ushqimore nga 15-20% më lirë.”-tha Balla.
