Deputetja e LSI-së, Monika Kryemadhi e ka festuar Ditën e Verës në qytetin e Elbasanit.
Kryemadhi uroj gjithë shqiptarët dhe theksoi se Elbasani është graviteti i kësaj dite dhe mbi të gjitha është kënaqësi të jesh në këtë qytet për këtë festë.
“Më surprizuan stendat e shkollave të mesme të cilat kishin sjellë produktet që prodhonin vetë”, theksoi ajo.
Pasi u njoh nga afër me punimet dhe kreativitetin e të rinjve në këtë qytet, Kryemadhi u shpreh; ky është një sinjal i mirë sepse ka të rinj të talentuar dhe duhet t’u japim shansin që të realizojnë ëndrrat e tyre.
Ajo vizitoi edhe panairin e librit, i cili ishte i hapur prej tre ditësh, për vizitorët e shumtë dhe banorët e këtij qyteti.
Që në kohët antike, “tempulli i 14 Marsit”, Dita e Verës, ka qenë aty ku sot quhet qyteti i Elbasanit.
E quajtur ndryshe si dita e largimit të dimrit, kjo festë ka krijuar tashmë traditën e saj jo vetëm tek banorët e qytetit të Elbasanit, por edhe në qytete të tjera të vendit. Festa e Verës ka qenë më shumë festa e Zonave të Ulëta.
Zanafillën “Dita e Verës” e ka në faltoren Zana e Çermenikës, e ndërtuar në rrethinat e qytetit të Elbasanit, e cila ishte perëndesha e gjuetisë, pyjeve dhe e te gjithë natyrës.
Sipas gojëdhënës, kjo zanë dilte nga faltorja e saj ditën e 14 Marsit.
