Nga Suada Daci
A ju kujtohet Xhesika seksi simboli i animacionit, e cila e shtyu në krim lepurushin “Roger”, të vriste njerëz për të?! Me siguri që po… por nuk është çudi që edhe ta keni harruar pasi në ditët e sotme ka shumë “Xhesika” që tërheqin vëmendjen e “lepurushave” parlamentar, që do ti ofronin atyre (jo vrasje si në filmin e animuar), por do të hiqnin edhe një pjesë nga “buka e gojës” së fëmijëve, vetëm për të kaluar një natë me to.
Xhesika Ndoj është një paralelizëm që vlen, edhe pse ajo i përket realitetit ku jetojmë, ku ndryshe nga “Xhesika” cartoon e cila e shtyu lepurushin e saj të vriste, kjo e jona është e aftë ti shtyj “lepurushat” e parlamentit tonë në krim financiar vetëm për të kaluar një natë me të.
Madje edhe të arrijë në refuzim. Ose më mirë të luaj me “lepurushat” e saj me kollare dhe makina të shtrenjta që ajo si një lozonjare i ka futur në një lojë ankandi.
Po si u bë e njohur Xhesika jonë dhe kush janë “Roger Rabbit” e pasur të parlamentit shqiptar, që po përpiqen të blejnë një natë të zjarrtë me të?
Ajo nuk na e thotë por na e lë të kuptohet, edhe pse ne e dimë se kush janë. Ajo do të luaj dhe ata janë vendosur në garë kush do të jetë ai që do t’ia dalë ta bëjë të tijën vajzën këngëtare, e cila po vazhdon ti rezistojë fuqishëm ofertave që kanë vërshuar lum pas statusit të saj të parë.
Por Xhesika e di që në këtë lojë erotike, nuk ka çfarë të humbasë….
Kështu u takova me dëgjuesën time një ditë në një nga baret e Tiranës. Ku “Xhesika” tanimë fenomeni, së bashku me një mikeshën e saj po fliste me një njeri me pozitë, i cili mezi priste ta ndihmonte për të realizuar ëndrrat e saj… një videoklip.
Personi në anën tjetër të telefonit nuk ishte deputet, por një punonjës në Parlamentin shqiptar, me të cilin këngëtarja me “extension” dhe buzë të fryra luante në një provokim fatal. Madje për të treguar që është ajo që e luan lojën, vendosi ta zhvillojë skenën duke e lënë telefonin me zë të hapur.
Po sa ka si fenomeni “Xhesika”?!
Jo më kot politikanët frekuentojnë të njëjtat vende ku qëndrojnë ato… vajzat seksi të ekranit. Marrëdhënia është e thjeshtë dhe aspak e komplikuar. Unë të ndihmoj të bësh “jetë sheikësh” (ndërsa ato “Xhesikat” e famshme të showbiz-it), janë thjesht sensacioni i çastit.
