Një aksident me pasojë vdekjen e një 68-vjeçari ka ndodhur ditën e djeshme në vendin e quajtur kthesa e Manzës, në rrugën Manzë-Gjiri i Lalzit.
Burimet policore thanë se në aksident janë përfshirë një motor tip “Piaggio” dhe një makinë tip “Ford”, ku për pasojë humbi jetën drejtuesi i motorit.
Policia tha se Shaqir Gjergji, 68-vjeç, nga fshati Radë, teksa levizte me një motor të tipit “Piaggio” është përplasur me një makinë të tipit “Ford” që drejtohej nga një i mitur me inicialet, R.Xh., 17-vjeç, te kthesa e Manzës.
Mësohet se adoleshenti që ende nuk e ka mbushur moshën për t’u pajisur me leje drejtimi, u arrestua në flagrancë nën akuzat: Shkelja e rregullave të qarkullimit rrugor dhe Drejtimi i automjeteve në mënyrë të parregullt.
Të njëjtat burime thanë se 17-vjeçari makinën ia kishte marrë një shoku.
Ky është rasti i dytë brenda pak ditëve që një i mitur aksidenton për vdekje një person, duke u kthyer në një problem serioz për sigurinë në rrugë.
Rasti i parë ndodhi ditën e dielë, ku një 15-vjeçar, mori pa leje makinën e të atit. Makina tip “Benz”, që drejtohej nga E.P., në bordin e së cilës ishin edhe tre të mitur të tjerë, shokë të tij, u përplas me një shtyllë.
Nga impakti i fuqishëm i automjetit me shtyllën në rrugën “Donald Trump” më Kamzë, humbi jetën K.C., 16 vjeç, ndërsa dy pasagjerët e tjerë: E.B. 11 vjeç dhe K.T., 16 vjeç, mbetën të plagosur.
