Dy ditë pas ndeshjes në Shqipëri që përfundoi pa gola, Federata Serbe e Futbollit ka publikuar një deklaratë për ditët që përfaqësuesja e tyre kaloi në Tiranë dhe situatat e krijuara në stadium.
Në një reagim, Federate Serbe vlerëson mikpritjen e FSHF-së dhe Presidentit Armand Duka, por dënon sjelljen e tifozëve gjatë takimit.
“Duam të nënvizojmë se i gjithë delegacioni i Federatës Serbe të Futbollit, gjatë qëndrimit të saj nga minuta e parë deri në atë të fundit në kryeqytetin shqiptar, pati një pritje të jashtëzakonshme nga Federata Shqiptare e Futbollit dhe Presidenti i saj Armand Duka. Fatkeqësisht, skena nga tribunat që bota e futbollit nuk do të donte t’i shikonte, skena që UEFA i ka luftuar prej vitesh përmes organeve dhe rregulloreve të saj, është njollosur me sjelljet e tifozëve”.
Federata Serbe e Futbollit shkruan se dënon fuqimisht shpërthimet të urrejtjes politike përmes formave të ndryshme të provokimeve dhe thirrjeve ndaj organizatave terroriste.
Në reagim shkruhet që ndaj futbollistëve janë hedhur sende të forta dhe arbitri ka ndaluar disa herë sfidën, duke kërkuar vetëpërmbajtje të tifozëve.
Pritet të shikohet qëndrimi i komisioneve disiplinore.
Gati 11 vite më parë në Beograd, ndeshja mes Serbisë dhe Shqipërisë u ndërpre pas trazirave ku u pushtua edhe fusha që shtrëngoi ekipin shqiptar të tërhiqej për shkaqe sigurie.
Fillimisht UEFA nuk mori parasysh pretendimet e Shqipërisë, por më pas KAS vendosi të dënojë Serbinë me humbje në tavolinë.
