TIRANË- Kamatëvonesat për faturat e pashlyera të energjisë elektrike do të falen për 22 mijë familje në gjithë vendin. Dhe bëhet fjalë për ato familje që janë me ndihmë ekonomike.
Pas rreth një vit të ashpër me masa ndëshkuese mbi çdo debitor të energjise elektrike dhe pas shumë lajmesh mbi familje të varfra që qendrojnë në terr pasi nuk kanë mundësi të paguajnë, Qeveria bën kthesën.
Ka qenë Kryeministri Edi Rama i cili doli në një konferencë të posaçme nga selia qeveritare për të dhënë lajmin e mirë.
Kushti për të përfituar këtë ulje drastike, tha shefi i qeverisë është pagesa simbolike prej 10 lekësh të reja dhe përditësimi i të dhënave të kontratës. Afati maksimal i saj është 31 janari i vitit të ardhshëm.
Përfitues nga ky vendim i qeverisë do të jenë edhe kategoroia e abonentëve që nuk ka respektuar marrëveshjen me OSHEE-në, por në kushte të tjera. Edhe kjo kategori duke u paraqitur pranë sporteleve të OSHE-së, duke përditësuar kontratën e paguar vetëm 100 lekë, përfiton falje të detyrimit, sa i përket zërit të kamatvonesës. Për këtë kategori, afati përmbushjës së kritereve do të jetë data 30 qershor 2016.
