Ministri i Brendshëm Fatmir Xhafaj ka deklaruar se në Durrës veprojnë disa grupe të fuqishme kriminale, që janë aktive prej 15 vitesh.
Xhafaj theksoi se këto janë grupe me rrezikshmë të lartë shoqërore dhe që janë skeduar nga Policia e Shtetit, por po punohet për të mbledhur prova ligjore që të bëhet e mundur goditja e tyre si dhe sekuestrimi i aseteve kriminale. Në të gjithë vendin janë evidentuar 9 grupe kriminale, nga të cilat 2-3 veprojnë në Durrës.
“Task Forca është vënë nën hetim të grupeve kriminale që janë 9 në shkallë vendi, një numër i cili për hir të së vërtetës është dhe këtu në Durrës. Jemi duke punuar fort për t’i goditur nga pikëpamja e ligjit. Jemi duke punuar ngushtë edhe me partnerët. Krahas ndëshkimit të tyre, jemi të fokusuar edhe tek hetimi dhe goditja e aseteve kriminale të tyre. Fuqia e tyre ekonomike nuk do të jetë më pronë e tyre, por do të kthehet në shërbim të qytetarëve. Nuk e pranoj faktin që 2 apo 3 grup, janë grupe që kanë aktivitet të gjatë në shumë vite, ndoshta 10-15 vjet në qytetin e Durrësit dhe janë grupe me rrezikshmëri të lartë shoqërore, nuk janë karakteristika të këtij komuniteti. Përkundrazi, nuk kanë asgjë të përbashkët me qytetarët e Durrësit, Krujës, Fushë-Krujës e të Shijakut”, deklaroi Xhafaj.
Ministri i Brendshëm theksoi se është e rëndësishme që të mblidhen sa më shumë prova ndaj këtyre grupeve, pavarësisht se policia është në dijeni të aktivitetit të tyre kriminal dhe pronave që ato posedojnë.
“Pavarësisht se mund të jemi në dijeni, po aq e rëndësishme është edhe sigurimi i provave të nevojshme konform ligjit. Ajo që kam thënë është fakti që ne sot jemi në gjendje të dimë se cilat janë grupet kriminale, cili është aktiviteti i tyre dhe çfarë fuqie posedojnë ato”, u shpreh ministri i Brendshëm Fatmir Xhafaj.
Këto deklarata ai i bëri nga Durrësi gjatë në forumin e bashkëbisedimit me qyterarët, një fushatë kjo që ka nisur ditët e fundit si pjesë e llogaridhënies së Policisë së Shtetit për punën e bërë.
