Shkoi të punonte në minierë, por mbeti në galeri në ditën e parë të punës. Kjo është tragjedia e Bashkim Sadikajt nga fshati Zogaj i Tropojës i cili humbi jetën dhe la pas katër fëmijë jetimë në kushte të skajshme varfërie.
Pa asnjë të ardhur dhe me një shtëpi të rrënuar, nënës i duhet të rrisë këta fëmijë të mbetur pa baba. Deputetja e Partisë Demokratike në Tropojë, Mimoza Hajdarmataj bëri një apel institucioneve shtetërore por edhe përfaqësuesve të biznesit, të reagojnë për këtë rast.
“Përveç apelit drejtuar Shërbimit Social, që të reagojë për këtë rast me një program të veçantë, në mbështetje të familjes e cila ka mbetur pa asnjë mbështetje dhe në kushtet e një varfërie ekstreme, me humbjen edhe të kryefamiljarit duke lënë 4 fëmijë jetim, një thirrje i bëj gjithashtu edhe komunitetit e biznesit, të mbështesin këtë familje pa asnjë mundësi ekonomike për mbijetesë”, u shpreh Hajdaramataj.
Minierat e fshatit Zogaj në Tropojë mbeten e vetmja mundësi punësimi për banorët e zonës pa asnjë mundësi tjetër ekonomike.
