Emisioni “Opinion” i kësaj të marte i dedikohet Artan Lames, që fatkeqësisht ndërroi jetë më 23 maj të këtij viti, pas një operacioni të vështirë në zemër. Gazetari Blendi Fevziu, e kujtoi Lamen jo vetëm si një zyrtar të rëndësishëm shteti, por si një njeri të apasionuar me historinë e vendit tonë.
“Sot familja, të afërmit, miqtë, por edhe të gjithë ata që e njihnin i kanë dhënë lamtumirën e fundit Artan Lames, një prej personazheve të njohur të Shqipërisë post-komuniste. Një prej atyre personazheve që më shumë se sa një zyrtar shteti me disa pozicione ndër vite, ishte një prej atyre njerëzve më të pasionuar të historisë së Shqipërisë, një njohës i shkëlqyer i të gjitha etapave të zhvillimit të shtetit shqiptar dhe një prej atyre njerëzve që kishte arritur të grumbullonte një histori të pashembullt të trashëgimisë përmes koleksioneve të tij të rralla.”
Edhe pse Lame ka qenë vazhdimisht i pranishëm në studion e “Opinion”, që para 28 vitesh, sonte do të keni mundësinë të shihni dy episode të veçanta të tij. Me një vlerë që përtej gjithçkaje, pasqyrojnë atë që Artan Lame ishte.
“Do dëgjoni zërin e tij, pasionin e tij, dashurinë që kishte për Shqipërinë”, tha Fevziu për mikun e tij që nga koha e studimeve.
“Ai ka qenë një prej atyre studentëve që përkrahu ndryshimet e vitit 1990, që u angazhua me shpresën e besimin se Shqipëria që do të vinte më pas do të ishte ndryshe nga ajo në të cilën ishim rritur ne”, shtoi ai.
“La një zbrazëti të jashtëzakonshme për familjen dhe miqtë, por edhe për studiuesit e historisë së shtetit shqiptar. Fati e solli që sot të mos isha në varrimin e tij sepse isha në Shtetet e Bashkuara të Amerikës, prej nga ku jam kthyer vetëm dy orë më parë, por do doja që ky emision ta rikthente atë jo nëpërmjet rrëfimit të të tjerëve, por vetë fjalës së tij”, përfundoi Fevziu.
Një prej figurave më të njohura publike shqiptare, Artan Lame drejtoi për disa vite Agjencinë e Legalizimit, Urbanizimit dhe Integrimit të Zonave Informale (ALUIZNI), si dhe mbajti poste të tjera shtetërore, duke qenë aktiv në radhët e Partisë Socialiste. Lame ishte publicist, opinionist dhe koleksionist shqiptar. Studiues i historisë shqiptare, veprimtar i shoqërise civile për mbrojtjen e trashëgimisë kulturore shqiptare. Gjithashtu, veprimtar politik i Partisë Socialiste dhe funksionar shtetëror.
