Mëngjesin e sotëm familjarët morën nga ambientet e Mjekësisë Ligjore trupin e pajetë të Admir Muratajt, i cili mbeti i vrarë pas grabitjes në Rinas. Ditën e djeshme, bashkëshortja e Admirit në heshtje e mes lotësh pranoi se trupi i gjetur në Tapizë i përkiste bashkëshortit të saj.
Trupi i të ndjerit u mbajt për disa orë në morgun e spitalit për të kryer autopsinë. Një plumb tejshpues në kokë ka qenë vdekjeprurës për një nga autoret e dyshuar të grabitjes me armë në Aeroportin e Rinasit.
Po ashtu dhe policia ka mundur ta identifikojë nëpërmjet profilit gjenetik që erdhi nga Greqia se grabitësi ishte Admir Murataj. Mbrëmjen e së mërkurës në emisionin “Opinion”, gazetarja Klodiana Lala tha se policia e pati të vështirë identifikimin pasi veç maskës së silikonit që mbante në kokë ai kishte bërë dhe ndërhyrje estetike në fytyrë.
Ndërsa ishte që nga viti 2013 në këkrim dhe realizoi grabitje si në filmat aksion, Admir Murataj arriti t’i shpëtonte autoriteteve.
Policia nuk ka thënë asnjë fjalë se ku fshihej gjatë kësaj periudhe, që për disa herë cenoi dhe sigurinë kombëtare të vendit, por burime të besueshme thonë se Murataj fshihej në zonën e Kamzës./Opinion.al
