Këtë të shtunë më datë 10 qershor, Shkodra mirëpriti edicionin e dytë të FamFest, ‘Familja, Shkollë e Dashurisë’.
Ky event ishte një angazhim i Federatës së Familjes në parteneritet me Federatën e Paqes Universale, mirëpritur nga Bashkia Shkodër.
Koordinatorët e Federatës së Familjes Shkodër kanë hapur eventin me fjalë përshëndetëse dhe mesazhe për të gjithë pjesëmarrësit.
FamFest e cila është në shërbim të të gjithë qytetarëve të Shqipërisë dhe dashamirësve të familjes, ka si qëllim mbrojtjen dhe promovimin e familjes tradicionale shqiptare, një familje ku respektohen gjyshërit, ku ne lindim prej dashurisë së nënës dhe babait, duke qenë kështu insititucioni jonë i parë ku marrim formimin bazë për botën nesër.
Eventi u realizua në sheshin ‘Nënë Tereza’ në të cilin gjeje kënde ku të gjithë së bashku mund të shkrepnin kujtimin e tyre.
Programacioni i këtij organizimi ishte konceptuar për të gjitha brezat e një familjeje duke përfshirë këtu muzikë nga artistë të mirënjohur të skenës shkodrane si Myfarete Laze dhe Rezarta Smaja dhe artistë të rinj për grupmoshat e reja.
Për pjesëmarrësit më të vegjël të eventit kishin menduar animatorët të cilët janë gjendur pranë fëmijëve duke e cilësuar këtë festë si të tyren.
Gjatë eventit janë ndarë edhe çmimet e konkursit të fotografisë me temë ‘Familja’, përkatësisht për tre vendet e para. Ky konkurs u zhvillua për të festuar 20 vjetorin e themelimit të Federatës së Familjes për Paqe Botërore dhe Bashkim në Shkodër.
Organizimi arriti kulmin e tij me marshimin e të gjithë të pranishmëve përgjatë Pedonales ‘28 Nëntori’ deri në sheshin ‘Parrucë’.
I gjithë grupi ka bërë thirrje për mbrojten e familjes, mos cënimin e saj nga faktorë të jashtëm dhe antivlera. Këto thirrje jehuan fort në momentin e fundit të marshimit ku gjithsecili lëshoi në qiell fenerë letre të ndezur me gjitha urimet për familjet tona./Opinion.al
