Motra e Fatmir Hoxhajt, i arrestuar prej 3 vitesh si i dyshuar për vrasjen e Ahmet Toskës në Fier në Tetor 2020, kërkon lirimin e vëllait të saj nga qelia.
Në një intervistë për emisionin Uniko nga Spartak Koka në Klan Plus, motra e Fatmir Hoxhaj kërkon që Prokuroria të bëjë ekspertim fizik të autorit që duket në kamerat e sigurisë dhe ta krahasojë me vëllain e saj.
Ajo thotë se familja ka bërë një ekspertim privat në Shqipëri e Itali, dhe rezultati ka qenë që vëllai i saj nuk përputhet me vrasësin që duket në video.
“Këtu fjala drejtësi është fjalë e huaj përsa i përket syrit tim. Nuk duam ta dimë kush është, pse, qysh, tek. S’është puna jonë, nuk është interesi jonë. Ne jemi njerëz në hallin tonë, ne erdhën na ranë në qafë, na morën vëllain. Ta krahasojnë, jo me një copë fletë nuk duket apo me një copë fletë nuk bëhet as këtu as jashtë shtetit. Atëherë ne si arritëm ta bënim? Nuk është një gjë e jashtëzakonshme. Kur bëhet nga një ekspert apo grup ekspertësh në Shqipëri, dhe mund të bëhet, ka teknologij, të vijnë ta bëjnë në Zvicër, në Amerikë, ta bëjnë në Londër, ta bëjnë në Izrael, ta bëjnë ku të duan aktin e ekspertimit, por ta bëjnë”, thotë ajo.
Ahmet Toska u vra më 26 Tetor 2020 herët në mëngjes në lagjen “Sheq i Madh” të Fierit.
Në fillimit të Nëntorit 2020, policia ndaloi Fatmir Hoxhajn si të dyshuar, sapo ky i fundit u kthye nga Italia në Shqipëri. Banesa e tij është në të njëjtën lagje, por Fatmir Hoxha jeton prej vitesh në Itali së bashku me familjen.
Emisioni Uniko ka publikuar edhe pamjet e vrasjes së Ahmet Toskës, ku shfaqet një person i maskuar që e qëllon me armë sapo i ndjeri del nga shtëpia me bashkëshorten për ta shoqëruar në punë këtë të fundit./tv klan.al
