Janë arrestuar ditën e sotme 8 persona në kuadër të një operacioni kundër informalitetit, të koduar “Biletë e falsifikuar”. Sipas burimeve nga policia, këto persona në bashkëpunim me njëri-tjetrin kanë falsifikuar bileta të transportit urban në kohë të ndryshme me qëllim “shmangien e detyrimeve tatimore dhe përfitim financiar të disa shoqërive operatore në transportin urban në qarkun Tiranë”.
Nga personat e arrestuar 4 janë administratorë të shoqërive të transportit, 2 dispancierë një ekonomiste dhe një 20-vjeçar i cili po përpiqej të zhdukte provat. Nga ky operacion policia sekuestroi 150 000 bileta urbani të falsifikuara, vënia në përdorim e të cilave kap vlerën 6 000 000 lekë të reja.
“Këta shtetas përdornin bileta urbani të falsifikuara dhe jo të prodhura në Shtypshkronjën e Letrave me Vlerë, të cilat i kishin hedhur në qarkullim duke përfituar shuma të konsiderueshme monetare. Nëpërmjet këtyre veprimeve i kanë shkaktuar shtetit një dëm të madh ekonomik, i cili do të përllogaritet në vazhdimësi nga strukturat e Drejtorisë së Përgjithshme të Tatimeve”, shkruhet në njoftimin e policisë. /Opinion.al
