Gjykata e Tiranës ka lënë në burg 2 nga 8 të arrestuarit për falsifikimin e biletave të urbanëve.
Lulzim Allaraj dhe Aldi Duka mbetën në burg, Ferdinand dhe Anastas Ibrahimi, Klodian Qato dhe Fatos Vrapi u lanë në arrest shtëpie, ndërsa për Erisa Voran dhe Albana Vrapin u vendos detyrim paraqitje.
Të arrestuarit kanë mohuar akuzat dhe kanë pretenduar se nuk kanë pasur dijeni për përdorimin e biletave false.
Ndërkohë konstatimin e biletave false e ka bërë Shtypshkronja e Letrave me Vlerë, më pas agjentët e tatimeve gjatë kontrolleve kanë sekuestruar bileta që kanë rezultuar se nuk ishin të prodhuara nga kjo shtypshkronje.
Pas nisjes së hetimeve, janë marrë një sërë dëshmish për të arritur te personat përgjegjës në bazë të detyrës që kanë pasur në kompani. Ndërkohë, nga përgjimi i telefonave, hetuesit kanë konstatuar se administratori Ferdinand Ibrahimi, i ka kërkuar djalit të tij që të zhdukë disa dokumente në makinën qe kishin para shtëpisë.
Nga kontrolli është konstatuar një sasi prej 105 mijë bileta që nga ekspertimi janë të falsifikuara./Opinion.al
