Kryeprokurorja e Përkohshme, Arta Marku ka nisur një hetim disiplinor ndaj ish-kreut të Prokurorisë së Rrethit Elbasan, Dritan Gina. Por ajo që të bën përshtypje në arsyetimin e nisjes së këtij hetimi është gjuha të cilën znj.
Marku ka përdorur në shkresë, ku më shumë se një arsyetim juridik që duhet të bazohej mbi shkelje konkrete të detyrës si prokuror nga ana e z. Gina, shkresa shfaq nota butaforike të një hatërmbetje që më shumë i shkon një zënke fëmijësh poshtë pallatit, se sa një drejtuese të lartë të një institucioni si Prokuroria e Përgjithshme.
Mjafton të lexosh 6 pikat e arsyetimit të nisjes së hetimit disiplinor për të kuptuar se znj. Prokurore të Përgjithshme është kujdesur në këtë shkresë më shumë për të rehabilituar lëndimin e saj të thellë se sa të japë arsye të vlefshme mbi arsyet e vërteta të lëvizjes së Dritan Ginës si Drejtues i Prokurorisë Elbasan.
Po kështu në shkresë znj.Marku kujdeset që ta evidentojë si puçist z. Gina që sipas saj kërkon të desantojë punën e strukturave të saj në Prokurori, ndërkohë shpreh edhe njëherë të gjithë lëndimin e saj kur i vihet në dukje prapavija politike me të cilën mori detyrën.
Ndërkohë që nuk duk aq e lënduar kur u betua si Prokurore e Përgjithshme e Përkohshme pa aprovimin e opozitës, në një sallë të mbushuar nga tymueset, pa denjuar madje as të vendosë dorën në Kushtetutë.
