Banorët e njësisë numër 4, në lagjen Allias i Ri, ankohen në emisionin “STOP” për ndotjen e ajrit pranë shtëpive të tyre. Kjo pasi aty punon pa asnjë kriter fabrika e asfaltit, e cila është në varësi të Bashkisë së Tiranës. Vetëm pak metra nga fabrika ndodhet një qendër shëndetësore, që ngjan më shumë me një pikë grumbullimi skrapi, një shtëpi për të moshuarit, një shkollë për fëmijët me aftësi të kufizuara dhe shkolla 9 – vjeçare “Ardian Klosi”.
Shëndeti i banorëve është i rrezikuar nga tymi e ndotja, që nuk ndalen as ditën e as natën. Aparati matës e nxjerr ndotjen nga 4 herë deri në 10 herë më të lartë se normat e Bashkimit Europian. Por përfaqësuesit e fabrikës janë të qetë. Veç faktit që nuk kanë leje mjedisore, ata thonë se do të zhvendosen në fillim të vitit të ardhshëm.
Disa qytetarë kanë denoncuar në redaksinë e emisionit “STOP”, fabrikën e përpunimit të asfaltit, e cila ndot ajrin fare pranë banesave të tyre, duke e provuar edhe me pamje filmike.
Gazetarja e emisionit iu drejtua kësaj fabrike, që ndodhet në njësinë numër 4, në lagjen “Allias i Ri”, për të pyetur nëse janë të pajisur me leje mjedisore për ta zhvilluar aktivitetin e tyre. Çka ra në sy ishte mungesa e një rrethimi, gjë që bën që të hyjë e të dalë kushdo, duke patur kontakt me materialet.
Banorët kanë thënë se në mes të fabrikës ndodhej një oxhak, që shërbente për djegien e materialeve, por tanimë e kanë larguar për të “humbur gjurmët”.
Banorët ankohen se kjo fabrikë punon gjatë mbrëmjes, duke e bërë të pamundur jetesën pranë saj. Ata gjithashtu ngrejnë pyetjen se përse kanë ndërtuar institucione pranë fabrikës së ziftit, kur të gjithë janë në rrezik.
“Nuk dalim dot përjashtë nga tymi, sidomos në darkë. Na mbahet fryma. Unë vij nga një zonë e largët, por këtu kam gjetur belanë! Nuk kollitem dot. Sa herë kam vajtur në spital, mushëritë i kam të bllokuara. Ne jemi të moshuar, duam të rrimë 2-3 ditë rehat, sa na ka mbetur. Por më keq është për fëmijët! Ku do të marrin frymë fëmijët në këtë ambjent kaq të ndotur?”
Nxënësit e shkollës “Ardian Klosi”, që ndodhet pak metra larg fabrikës, ankohen se u djegin sytë dhe se gjatë pushimit nuk ushqehen dot për shkak të erës së keqe të ziftit.
“Ne e kemi shkollën shumë të bukur, por ne nuk i hapim dot dritaret sepse kur ndizet fabrika e ziftit, ne s’mund të marrim erën e ziftit sepse na ndot mushkëritë!”
