Afro 125 mijë shtetas të huaj u urdhëruan të largoheshin nga territori i një vendi të Bashkimit Europian, ndërsa rreth 29 mijë persona të tjerë u kthyen në vendet e treta pas një urdhri largimi gjatë 3-mujorit të katërt të vitit 2024.
Sipas EUROSTAT, krahasuar me të njëjtën periudhë të vitit 2023, numri i shtetasve jashtë BE-së të urdhëruar të largohen është rritur me 16,3%, ndërsa numri i personave të riatdhesuar në vendet e treta është rritur me 24,3%.
Ndër vendet e BE-së, numri më i madh i shtetasve të urdhëruar të largohen nga territori i një vendi të BE-së është regjistruar në Francë dhe pas saj vjen Spanja dhe Gjermania. Ndërsa Italia renditet e pesta pas Greqisë.
Nisur nga origjina, shtetasit që u urdhëruan të largoheshin nga territori i një vendi të BE-së në këtë periudhë, shumica ishin algjerianë, të ndjekur nga sirianët dhe marokenët.
Gjermania, Franca dhe Suedia shënuan numrin më të madh të personave të kthyer në vendet e treta.
Ndërkohë në mesin e atyre që u riatdhesuan në vendet e treta, 3 350 ishin gjeorgjianë, 2490 ishin turq dhe në vend të tretë renditen shqiptarët me 1 980 shtetas të kthyer.
EUROSTAT konstaton se krahasuar me të njëjtën periudhë të një viti më parë, numri i kthimeve në një vend të tretë është rritur për marokenët, turqit, moldavët dhe gjeorgjianët, ndërsa një rënie është vërejtur për shqiptarët me -0.9%.
Tv Klan
