Nga Dritan HAXHIRAJ
Ajo që pritet të shikojmë të dielën në Romë mundet të jetë sinjali i parë se çfarë do të ndodhë në muajt në vazhdim me lidershipin europian dhe me ecurinë e monedhës europiane. Referendumi i datës 4 dhjetor në Itali, në thelbin e tij ka në lojë ç’burokratizimin e administratës, uljen e përfitimeve ekonomike dhe mbi të gjitha ta bëjë Italinë një vend ku stabiliteti politik dhe ai ekonomik të ecin bashkë. I parë në skenarin e brendshëm politik në lojë është fjala ndryshim.
Renzi po e bën ndryshimin në letër duke kërkuar që populli të shprehet duke luajtur dhe me karrierën e tij politike. Çka mund të sjellë daljen e tij në pension politik në moshën 42 vjeçare. Grillo flet në emër të ndryshimit duke hedhur sytë nga tërmetet politike që kaë ndodhur në Perëndim; Brexit dhe Epoka Trump… Ti marrim punët me radhë. Pas fitores së Brexit, në Londër stërlina angleze është zhvlerësuar me 13%, një bombë e vërtetë për veshët e ekonomistëve dhe e komentatorëve politikë dhe nuk mbaron këtu, bilanci për vitin që vjen i qeverisë angleze do të jetë 60 miliardë me pak.
Në këto shifra anglezët patën benefite monetare me daljen nga Eurozona, sepse e parë kështu këto janë “bomba me sahat” për propagandën populiste? Ardhja në fuqi e Presidentit Trump do të krijonte një vakum të ri me establishmentin politik europian duke futur brenda pyetjet e mëdha për emigracionin dhe sfidat e saj, globalizimin dhe pikëpyetjet se si është zbatuar dhe çfarë dramash sociale ka dhënë në një fuqi ekonomike si Italia e me gjerë, dhe a jemi ne sot më të sigurtë në Europë me çfarë po ndodh ne trekëndëshin Moskë-Ankara-Lindje e Mesme?
Si do të reagonin tregjet me fitoren e Grillos duke ditur se 8 banka rajonale italiane janë në prag falimentimi dhe një Itali me një jo stabilitet politik do të ishte një tjetër goditje për shtëpinë që fut ujë nga të gjitha anët, atë Europiane. Baballarët politikë kur e ideuan këtë Europë dilnin nga lufta në plan të pare vunë ekonominë, mirëqenien e miliona europianëve. Sot këto letra kanë vite që po digjen në duart e aparateve burokratike të Brukselit, ca me dashje, ca pa dashje por faktet politike janë aty, para syve të të gjitheve. Fitojnë populistët sepse burokracia po vdes demokracinë e shëndoshë, atë në realitet jo atë të shkruar në letër. Nje Europë pa Romën do të ishte fillimi i fundit politik të kësaj shtëpie që po fut ujë kudo. Europa pa lider i ka sytë nga Roma…..
