Partizani vijon përgatitjet për ndeshjen e parë të “play-off”-it të Ligës së Europës, që do ta luajë më 18 gusht kundër rusëve të Krasnodarit, në fushën e këtyre të fundit. Megjithatë, kanë lindur probleme të mprehta, të cilat mund ta detyrojnë klubin e kuq ta bojkotojë këtë transfertë, gjë për të cilën ka njoftuar edhe UEFA-n përmes një shkrese zyrtare. Po kështu, kjo gjë u është bërë e ditur edhe drejtuesve të klubit rus, si organizatorë të ndeshjes. Presidenti Gaz Demi duket i vendosur në këtë vijësjellje, nëse Ambasada Ruse në Tiranë nuk pajis me viza futbollistët kosovarë të Partizanit, Ibrahimi dhe Ramadani. Deri në këto moment, dy lojtarëve në fjalë u është refuzuar hyrja në Rusi, për shkak se kanë pasaportë kosovare, e cila nuk njihet nga autoritetet ruse, ashtu si shteti më i ri në Ballkan.
Nga kjo situatë ka shpëtuar Arbnor Fejzullahi, i cili ka tashmë edhe pasaportën shqiptare. Duke parë refuzimin kategorik të Ambasadës Ruse në Tiranë, drejtuesit e “demave të kuq” i janë drejtuar me shkresë zyrtare UEFA-s për pengesat që po hasin. Po kështu, ua kanë bërë me dije kolegëve të Krasnodarit situatën, duke kërkuar edhe ndërhyrjen e tyre. Ata kanë ngritur supet, të pazotët të bëjnë diçka, sepse kjo është një çështje shtetërore, me të cilën mund të merret vetëm ministria e jashtme. Në këtë situatë, presidenti Gaz Demi e ka ndarë mendjen. Pa Ibrahimin dhe Ramadanin, dy lojtarë titullarë, të formacionit bazë, Partizani nuk udhëton drejt Rusisë. Kjo vendimmarrje është e qartë për UEFA-n, edhe për Krasnodarin.
E para nuk sheh asnjëlloj pengese, që të ndodhin të tilla gjëra, aq më tepër tani që e ka njohur edhe Kosovën si kombëtare, jo më pasaportat e lojtarëve prej andej, kështu që përgjegjësia duket se do të mbetet tek autoritetet ruse. Thënë ndryshe, sportivisht do të penalizohet Krasnodari, me humbje 3-0 në tavolinë, nëse të kuqtë nuk paraqiten për shkaqe josportive, që i tejkalojnë ato si klub. Burime pranë Partizanit thonë se nuk ka pikë dyshimi: nëse lojtarët nuk pajisen me vizë dhe nuk lejohen të udhëtojnë drejt Rusisë, ata nuk udhëtojnë fare për këtë ndeshje dhe kanë siguri të plotë se fitoren do ta marrin në tavolinë. Pastaj, Krasnodari le të paraqitet në kthim e ta nisë gjithçka nga disavantazhi 3-0. Kjo është situata e momentit, e cila mund të ndryshojë vetëm falë palës ruse, nëse hap “dritën jeshile”.
