Kryeministri Edi Rama ka marrë pjesë në Konferencën e Sigurisë në Mynih në një panel ku u fol për zgjerimin e Bashkimit Europian. Kreu i qeverisë u shpreh se ajo që po ndodh aktualisht është shumë e mirë sepse Europa duhej shkundur.
“Ajo që po ndodh është një gjë jashtë mase e mirë sepse unë e shoh nga ajo pjesë e Europës që nuk është në BE. Ne jemi E pa B dhe i shohim gjërat paksa ndryshe. Është një gjë shumë e mirë që ka ndodhur sepse Europa duhej të shkundur në një mënyrë të tillë që t’u humbte gjumi për ca kohë dhe të shohim çfarë do dalë nga kjo”, tha ai.
Kryeministri u shpreh se Bashkimi Europian duhet ta ndajë mendjen për atë që po ndodh. Ai theksoi se qëndrimi i BE sa i takon ritmit të përafrimit me Ballkanin Perëndimor po ndryshon, por shumë ngadalë. Sipas tij, procesi i bazuar në meritë, duhet të jetë vetëm për një gjë, të drejtën e votës së shteteve anëtare në Këshillin Europian.
“Mendoj që Europa, BE duhet të ndajë mendjen për atë çfarë po ndodh sepse ka ndryshuar sa i takon qëndrimit kundrejt nesh dhe ka ndryshuar sa i takon ritmit të përafrimit me Ballkanin Perëndimor. Por ajo çfarë po ndodh është që ndryshon shumë ngadalë e shumë pak. Mund të flasim gjithë ditën për procesin bazuar në meritë, por besoj që ka ardhur koha të bëjmë një ndarje shumë të qartë e shumë të menjëhershme. Procesi i bazuar në meritë duhet të jetë vetëm për një gjë, për të drejtën e votës në Këshillit Europian”, tha Rama.
Ndryshe duhet të ndodhë sa i përket sjelljes në tregun e përbashkët. Ai tha se duhet ecur me shpejtësi edhe sa i përket investimeve perëndimore në Ballkanin Perëndimor, të cilin e konsideron si parkun e BE-së.
Ai u shpreh se “Evropa duhet të bëhet një kontinent shumë ndryshe bazuar në dhënien e mundësive të reja gjithkujt për t’u rritur ekonomikisht, në të kundër do të jetë e pamundur”.
“Mendoj që kjo tashmë mund të përshpejtohet tërësisht, mund të jetë diçka që lidhet shumë më tepër me sjelljen e asaj pjese të Europës që nuk është në BE shumë më pranë, në mënyra të ndryshme se si e mendon kontinentin vetëm. Nëse mendojmë për kontinentin vetëm si i tërë pa Rusinë jemi 700 milionë. BE duhet të bëjë diçka për këtë në kuptimin që ajo që është jashtë BE nuk mund të jetë një hapësirë që mund ta marrë kushdo, por vetëm BE. Ballkani Perëndimor duket si tek parku i BE. Një vend ku mund të ndodhin shumë gjëra. Shumë gjëra kanë ndodhur në Poloni, në Çeki, në Sllovaki kur kompanitë perëndimore shkuan, investuan shumë, sollën shumë dividente mbrapsht në BE dhe i ndihmuan këto vende. Kështu që të ecim me një shpejtësi mbresëlënëse. Kjo është ajo që po them, duhet të ndryshojë shumë Europa dhe nuk e them vetëm, unë e thonë shumë njerëz, Mario Draghi nxorri një raport të fortë që Europa duhet të ndryshojë. Ka të bëjë me konkurrueshmërinë, me sipërmarrjen”, tha Rama.
