Përfaqësuesja e 16-vjeçarëve të Shqipërisë është kualifikuar në gjysmëfinalet e Divizionit C në Eurobasket.
Skuadra e drejtuar nga trajneri Elidon Beqo siguroi vendin mes katër më të mirave të eventit që po zhvillohet në Shkodër, pasi u klasifikua e dyta në Grupin A. Pas dy fitoreve të para me Maltën dhe Moldavinë, djemtë kuqezi zhvilluan finalen për kreun përballë Armenisë. Dueli përfundoi me fitoren 97 me 63 për armenët që siguruan në këtë mënyrë edhe vendin e parë. Për përfaqësuesen e Shqipërisë, në parket spikatën Andreas Bokaj me 17 pikë, por edhe Gleid Mema, Noel Bejko dhe Aron Klosi.
Rrugëtimi në Eurobasket për 16-vjeçarë do të vijojë me duelin në gjysmëfinale ndaj Luksemburgut, skuadër që fitoi Grupin B. Ndeshja do të luhet të shtunën, prej orës 19:00 në pallatin e sportit “Qazim Dervishi” në Shkodër.
Në gjysmëfinalet e Eurobasket do të luajë edhe përfaqësuesja e vajzave për grupmoshën 16 vjeç. Tv Klan
