Ashtu sikurse shumë kishin menduar, kombëtarja shqiptare do të përballet me Zvicrën në një nga ndeshjet për grupin në Euro 2016, pikërisht më 11 Qershor të vitit të ardhshëm.
Pikërisht këtij fakti, gazeta britanike “The Sun” i ka kushtuar një artikull, duke e konsideruar përballjen si kryendeshje e grupit A.
“Në pamje të parë duket se nuk ka asgjë elektrizuese në këtë ndeshje, përveç padurimit për të parë në lojë “Mesin alpin”, Xherdan Shaqiri, por nëse i futesh pak me themel dy skuadrave, zbulon që kjo ndeshje do të jetë një lojë nervash mes dy skuadrave. Shqipëria ka të paktën 7 futbollistë në gjirin e saj që kanë lindur në Zvicër. Kohët e fundit, De Biazi ka grumbulluar lojtarët: Arlind Ajeti, Berat Gjimshiti, Fredi Veseli, Amir Abrashi, Migjen Basha, Shkëlzen Gashi dhe Taulant Xhaka, që të gjithë të lindur në Zvicër”, shkruan “The Sun”.
Por sipas britanikes, kjo është vetëm njëra anë e medaljes. Ana tjetër sipas saj, është se Zvicra ka në gjirin e saj të paktën 6 lojtarë me kombësi shqiptare. “Në këtë ndeshje do të kemi përballjen mes dy vëllezërve Xhaka, ku njëri ka zgjedhur të luajë për Zvicrën dhe tjetri për Shqipërinë”, shkruan “The Sun”.
