Marti Kuusik dha dorëheqjen nga posti i Ministrit të Tregtisë dhe Teknologjisë në Estoni, pak orë pasi bëri betimin. Shkak për këtë është bërë hetimi i policisë për dhunë në familje.
Megjithëse ka dhënë dorëheqjen, ai ka thënë se gjithçka është shpifje nga mediat.
“Më lejoni të konfirmoj përsëri se akuzat e bëra kundër meje janë shpifje, unë nuk përfshihem në dhunë. Ky është një sulm i tmerrshëm mediatik”, është shprehur ish-ministri.
Marti Kuusik është anëtar i Partisë Popullore Konservatore në Estoni, në koalicion qeverisës me Partinë Qendrore të udhëhequr nga kryeministri Juri Ratas.
Kryeministri Ratas u shpreh i kënaqur për vendimin e Kuusik për të dhënë dorëheqjen, duke thënë se nuk ka vend për justifikime. “Nuk ka vend për justifikime apo dyshime, siç e dimë që Estonia ka mijëra viktima të dhunës në familje”, tha kryeministri./Opinion.al
