Pesë persona u arrestuan nga policia gjatë një operacioni që u bë dy ditë më parë në zonën e Liqenit të Thatë në kryeqytet. Ata dyshohet se janë autorë të disa vjedhjeve në vila luksoze në periferi të Tiranës.
U vunë në pranga Dorjan Lamani (Qirjazi),, i cili është dënuar në Greqi me burg përjetë, si dhe 4 persona të tjerë Dajvid Dosti, Redian Bega, Klodian Çupi dhe Halil Topalli.
Ndërkohë një prej tyre në dëshminë e dhënë në Prokurori ka rrëfyer për mënyrën sesi i gjenin vilat dhe si i ndanin paratë me njëri-tjetrin. Dajvid Dosti u ka treguar prokurorëve se ishte Dorjan Lamani (Qirjazi), ai që iu dërgonte me ‘google maps’ vilat të cilave iu ishte ‘vënë syri’ për t’u grabitur.
“Më datë 12 prill, rreth orës 10.00 e ka marrë në telefon ne rrjetin social “Messenger” shtetasi Dorjan Qirjazi, i cili i ka thënë “që duhej të takohemi”. Rreth orës 10:30 janë takuar te një lokal në zonën e Astirit. Gjatë kësaj kohe ai i tha që “ështe një punë e bën dot apo jo. Është një shtëpi te Tegu dhe do ta vjedhim”.
Dajvid Dosti tregon se i është përgjigjur: “I thashë se do e bëj”, ai më tha “ok” , gjatë kësaj kohe Dorjan Qirjazi i ka treguar banesën që do të vidhnin nëpërmjet “Googles maps”, pra nëpërmjet hartës. Dorjani i ka thënë që “në këtë banesë nuk kishte njeri dhe se personat që banonin ishin në punë”, gjithashtu ai i ka thënë ik se “nuk do dalësh bosh atje”, thuhet në dosjen e siguruar nga news 24.
Gjatë kësaj bisede që kanë bërë gjithashtu kanë folur edhe për ndarjen e saj që do të merrnim dhe se pjesën më të madhe do e kishte Dajvid Dosti dhe pjesën tjetër do e merrte Dorjani. Gjithashtu Dorjani i ka dhënë një vegël si “krik dore” te madh për hapje dyersh, një kacavidë të madhe dhe një Radio marrëse-dhënëse, të cilat do e ndihmonin të hapte dyert.
“Me Dorjanin e lamë që pasi të vidhja banesën do të takoheshim te shtëpia e tij në zonën e Astirit për të ndarë lekët.” citohet në dosje.
Grupi i grabistësve u godit dy ditë më parë nga policia në kuadër të operacionit “Start&Stop”./Opinion.al
