Emisioni “Stop” ndodhet në fshatin në Cakran të Fierit, pasi Taulant Haxhiaj tregon se prej disa kohësh, një i moshuar, i afërm i tij, i vë zjarrin pronës së tij, duke pretenduar për pronësi.
Në shkrumb kanë përfunduar edhe banesa e ullishtja. Autoritetet nuk po gjejnë zgjidhje, për shkak të moshës 86-vjeçare të autorit të zjarrvënies.
“Kemi në pronësinë pronën këtu në fshat dhe ullinjtë shekullorë, por kemi një problem me njeroun tonë në fis, që kemi këtu lagje. Pretendon se banesën e ka të tij, prishi pake nga pak muret, i vuri zjarrin banesës, ka prerë e ka djegur ullinj. Ka nisur edhe shkatërrimin e pronës. E kemi kapur këtu duke vënë zjarrin me pamje filmike e me të gjitha, ka ardhur policia edhe zjarrfikësja dhe e kanë lënë që të ikë për qejf. Këto një zgjidhje”, thotë denoncuesi, Taulant Haxhiaj.
I moshuari Seit Haxhiaj është nën masën “arrest shtëpie”, por lëviz lirisht. “Stop” takoi Seitin dhe ai pranoi, që i kishte vënë zjarrin ferrave, por mohon ta ketë bërë këtë me banesat e ullinjtë. “Ai ia ka vendosur zjarrin jo unë. Ai dogji arkat e bletëve. Merre procesin formular të policisë,asnjëherë nuk më ka kapur në flagrancë”, pretendon i moshuari.
Kur i tregohet videoja, i moshuari pretendon se është montazh.
Seit Haxhiaj: Nuk jam në arrest shtëpie, nuk kam qenë as një ditë moj, jo asnjë vit. Më gjej një motiv se përse duhet që të më arrestojnë. Le t’i djeg ullinjtë, ata janë të mijtë.
Gazetarja: Po ky këtu kush është? (I tregon videon)
Seit Haxhiaj: Po pse është zor që ta bësh fotokopje, karton!
Gazetarja: Ti thua që është montazh.
Seit Haxhiaj: Ai më filmoi kur vajti policia.
Sipas Drejtorisë Vendore të Policisë Fier, 86-vjeçari Seit Haxhiaj është kapur në flagrancë, duke vënë zjarr dhe është shoqëruar disa herë, pasi ka thyer masën e sigurisë. Për shkak të veprës së përsëritur, materialet janë referuar në prokurori.
