Ermal Hoxha, nipi i diktatorit, Enver Hoxha (djali i djalit) ka lënë qelinë e burgut më datë 13 shtator, duke kryer vetëm 4 vite burg nga 10 që ishte dënuar fillimisht nga Gjykata e Shkallës së Parë e Krimeve të Rënda. Sakaq, më 15 Nëntor 2017, Gjykata e Apelit vendosi gjykim të shkurtuar per dosjen “Xibraka”, dhe Ermal Hoxhës nga 10 vite iu ul dënimi në 6 vite e 8 muaj burg.
Por as këto nuk i bëri! Këtë muaj, (shtator 2018), gjyqtari Spiro Sota i Gjykatës së Shkallës së Parë në Fier vendosi lirimin me kusht të Ermal Hoxhës, duke i falur afro 2 vite nga burgu që i kishte mbetur.
Në vendimin e gjykatës së Fierit thuhet se “Lirimi me kusht është bërë pasi Hoxha ka plotësuar afatet në bazë të nenit 59 për lirimin me kusht të dënuarit kur ka kryer 3/4 e dënimit si dhe në bazë të raportit të vlerësimit të të denuarit që ka qenë pozitiv dhe të gjitha palët kanë qenë për pranim kërkese. Po ashtu janë marrë parasysh dhe faktet që është kryefamiljar me një fëmijë të mitur”.
Dosja “Xibraka”
Nipi i Enver Hoxhës, ishte arrestuar gjatë një aksioni ndërkombëtar i cili zbuloi laboratorin e parë të drogës në vendin tonë në fshatin Xibrakë 10 km larg qytetit të Elbasanit. Në të u përfshinë forca të shumta policore, nën bashkëpunimin e INTERPOL-it dhe EUROPOL-it.
Operacioni ‘Xibraka’ u zhvillua më 14 Janar të 2015, në pranga ranë 11 persona mes tyre dhe 2 kolumbianë të cilët sipas hetimeve merreshin me përpunimin e kokainës dhe pse në Shqipëri e kishin mbërritur me leje pune dhe si futbollistë.
Në pranga përfunduan: Saimir Batku, 43 vjeç nga Tirana, Fatmir Hoxha, 48 vjeç, Kastriot Imeri, 47 vjeç nga Tirana, Gentjan Gjonaj, 43 vjeç nga Vlora, Arjan Dalipi, 50 vjeç nga Elbasani, Kelment Dalipi 45 vjeç nga Elbasani, Ilir Hyseni, 47 vjeç nga Tirana, Ermal Hoxha, 40 vjeç (nipi i Enver Hoxhes) nga Tirana, Egest Dankesi, 27 vjeç nga Elbasani.
Arrestimeve iu shpëtoi Genci Xhixha, i cili njihet si kreu i një rrjeti të fuqishëm të trafikut të kokainës në Europë dhe më gjerë. Xhixha mendohet se strehohet në Kubë.
Në laborator u gjet dhe sekuestrua sasia prej 19 kilogramë e 416.2 gr lëndë narkotike e dyshuar kokainë; 8 kg e dyshuar si përziers i lëndës narkotike kokainë; 400 euro; 769.000 lekë të reja dhe 4150 dollarë amerikanë.
*Dokument: Vendimi i Gjykatës së Fierit për të liruar Ermal Hoxhën
