Nënkryetari i LSI-së, Petrit Vasili e ka cilësuar ‘Shengenin ballkanik’ si një projekt për mbajtjen e pushtetit të oligarkëve.
“Mini-Shengeni nuk është as më shumë dhe as më pak, thjeshtë dhe vetëm një shërbim në interes të mbajtjes së pushtetit të oligarkëve politikë dhe ekonomikë në Serbi, në Shqipëri dhe gjetkë.”, deklaroi ai në një deklaratë për mediat.
Ai akuzoi kryeministrin Rama se nuk ka asnjë plan për përmbushjen e kushteve të integrimit europian të Budestagut por po tenton ta zëvendësojë integrimin me iniciativën rajonale.
“Është Europa mor budalla, është integrimi mor budalla dhe jo mini-Shengeni, është perëndimi mor budalla dhe jo lindja orientimi i shqiptarëve.
Mini-Shengeni pikërisht për këtë të zhvillohet dhe të ngrihet lart këto ditë, ndërkohë që kanë kaluar 2 muaj e gjysëm nga 9 kërkesat për integrimin evropian dhe as Edi Rama dhe as të tijtë nuk flasin asnjë fjalë për plotësimin e 9 kushteve, nuk kanë asnjë lloj platforme apo pakti të çdo lloj forme, pakti kombëtar, pakti politik apo çfarë duhet ta quajnë në mënyrë që ky integrim të ecë përpara. Por, e kanë zëvendësuar të gjithë punën intensive, të tërë prokupacionin e jashtëzakonshëm politik, mobilizimin e të gjithë energjisë dhe faktorëve për të ecur përpara drejt integrimit europian me mini-Shengenin si iniciativën më të turpshme që është parë ndonjëherë në të gjithë hapësirën ballkanike, por dhe më gjerë.”
Vasili shtoi gjithashtu se qëndrimi i Ramës ndaj Kosovës është i paprecedentë dhe tradhtar.
“Edi Rama tregoi qartë qëndrimin më të egër që është parë ndonjëherë kundra Kosovës, qëndrimin më tradhtar ndaj Kosovës, qëndrimin më të pa besë ndaj Kosovës, qëndrimin që kurrkush nuk e ka mbajtur, kurrkush nuk ka guxuar të artikulojë”, tha Vasili. /Opinion.al
