Policia arrestoi dje një nga personat e dyshuar si pjesëmarrës në vrasjen e ish-policit Santiago Malko mbrëmjen e 27 gushtit në zonën e “Xhamllikut” në Tiranë.
Pikërisht në të njejtën zonë u bë lokalizimi dhe më pas arrestimi i Ilir Selmanit.
Ai u shoqërua në ambjentet e policisë dhe është pyetur në lidhje me ngjarjen.
Burime nga ABC News brenda grupit hetimor bëjnë të ditur se Selmani i ka mohuar akuzat e pjesëmarrjes në vrasjen e Malkos dhe madje ka thënë se nuk e ka njohur fare këtë person por vetëm e ka parë në televizor.
Sa i përket të dyshuarit kryesor si porositësi i vrasjes, Leonard Duka, Selmani ka thënë se me atë ka lidhje të vjetra shoqërore por se nuk janë takuar prej muajsh.
Burime nga Balkanweb raportojnë gjithashtu se Selmani i ka thënë grupit të hetuesve se ai dilte rrallë nga shtëpia pasi i kërcënohej jeta nga Ervis Martinaj.
“Prej muajsh kam qendruar i fshehur dhe rralle kur dilja levizja i armatosur, sepse me rrezikohet jeta nga kundershtaret e mi dhe te Leonardit. Me kane thene se Ervis Martini do te me heqe qafe”, mësohet të ketë thënë Selmani para policëve.
I njohur me nofkën ‘Boksieri’, Selmani dyshohet se është personi i cili ktheu makinën në momentin që Leonard Duka ka njoftuar për lokalizimin e Malkos.
Nga kqyrja e kamerave të sigurisë ai shihet gjithashtu teksa mbledh bishtat e cigareve që kishte hedhur në tokë Blendi Teta, njeriu që mendohet se survejoi lëvizjet e ish-policit Santiago Malko. Selmani mbledh bishtat duke i hedhur në një kazan mbeturinash për të zhdukur çfarëdolloj prove që mund të ishte e rrezikshme dhe të identifikonte grupin.
Kujtojmë se pas krimit ai ishte i vetmi nga anëtarët e grupit që kishte një jetë publike në rrjetet sociale ku ekspozonte armë, bizhuteri dhe makina të shtrenjta madje dhe në destinacione të ndryshme në botë. /Opinion.al
