Dy ditë pas lirimit nga burgu, ish-deputeti Ervin Salianji, mori pjesë këtë të enjte në ceremoninë e inaugurimit të shtatores së Josif Budos në qendër të Kavajës.
Para pjesëmarrësve ai mbajti një fjalim, ku u shpreh se po zgjidhte të fliste nga zemra, si një individ që sapo kishte dalë nga burgu duke kujtuar dhe eksperiencën e tij në izolim, për të cilën u shpreh se atje jeta numërohet me orë.
“Zemra më thotë të flas si qytetar dhe jo si politikan. Si një individ që sapo përfundoi njohjen me burgun, jo si një metaforë por si një realitet në diktaturën e re. Në një izolim ku jeta numërohet me orë, por me durim. Sot nuk po përcjellim thjesht kujtimin e një njeriu. Josif Buda nuk ra nga rastësia. Doli të kërkonte liri, drejtësi. Kishte guximin të mos pranonte të gënjehej. Në një kohë kur të shihje në sy të keqen, dhe për këtë ai u vra.”, tha Salianji.
Ish deputeti, gjatë fjalës së tij u shpreh se Josif Buda sot ka lënë një pyetje të madhe që ende nuk e ka humbur forcën: “A ia vlen të jetosh një jetë të qetë nëse ajo jetë është pa dinjitet?!”
“Por të pranojmë një të vërtetë të madhe. Këta njerëz nuk vriten, këta njerëz nuk zhduken. Ishin dhe janë ndërgjegjja e këtij kombi. Ai na la një pyetje që nuk e ka humbur: A ia vlen të jetosh një jetë të qetë nëse ajo jetë është pa dinjitet?! Të gjithë që kanë kaluar ferrin e diktaturës e dinë se ajo që e shpëton njeriun nuk ishte buka, por besimi.
Pa diskutim ne sot kemi të gjithë përgjegjësinë që ajo ditë të rilindë sërish në Shqipëri. Josifi nuk e pa dot atë ditë, por ne jemi sot këtu falë individëve si ai. Ne nuk guxojmë ta shpërdorojmë sakrificën e tyre. Sot jemi të lirë, sepse dikush zgjodhi që të mos bëhej pjesë e turmës, sot jemi këtu sepse Josifi tha ‘Jo’. Në një kohë kur një ‘Jo’ mund të të kushtonte shumë më shumë se sot.
Për këtë ai nuk duhet të kujtohet vetëm si viktimë e regjimit, por si dritë. Të dashur miq, në një botë që harron shpejt, jo për të vajtuar por për të kujtuar se e vërteta është gjithmonë më e thellë se frika. Lavdi Josif Budës.” , u shpreh ish-deputeti.
