Avokati i deputetit Ervin Salianji ka bërë një kërkesë në Gjykatën e Lartë ku kërkon pezullimin e vendimit të dënimit ndaj klientit të tij.
Kërkesën e bazon në nenin 417 pika 1 e Kodit të Procedurës Penale, ku saktësohet se “në rastet e rekursit, vendimi mund të pezullohet nga Kolegji Penal i Gjykatës së Lartë vetëm në rastet e parashikuara nga pika 1 e nenit 476 të këtij Kodi”.
Avokati argumenton se në rrethana të tilla kur do të bëjnë rekursin e vendimit të Apelit, duhet të ketë një pezullim të ekzekutimit të vendimit që e dënon me burg Salianjin.
Kjo për shkak se Apeli nuk ka vënë në dispozicion vendimin e arsyetuar të dënimit të Ervin Salianjit, çka mundëson më tej bërjen e rekursit në Gjykatën e Lartë.
“Si fillim kemi depozituar një “Rekurs të përmbledhur” pranë kësaj gjykate, duke ruajtuar të drejtën për plotësimin e tij pas njoftimit të vendimit të arsyetuar të gjykatës. Në lidhje me këtë fakt i jemi referuar qëndrimit të mbajtur nga Kolegji Penal i Gjykatës së Lartë me vendimin Nr. 00-2024-1288 Vendimi, datë 12.07.2024, ku në lidhje me këtë element ka arsyetuar se: “Kolegji thekson se, në zbatim të nenit 417 të KPP, depozitimi i rekursit është parakusht për vënien në lëvizje të Kolegjit Penal për shqyrtimin e kërkesave për pezullimin e ekzekutimit.
Referuar këtyre dispozitave, Kolegji Penal konstaton se kërkesa objekt shqyrtimi plotëson kriteret formale të pranueshmërisë, është nënshkruar nga mbrojtësi i zgjedhur, është paraqitur rekursi (ndonëse është i përmbledhur), si dhe kërkesa është shoqëruar me aktet e domosdoshme, përfshi këtu edhe vendimin për të cilin kërkohet pezullimi i ekzekutimit. Në fakt, së bashku me aktet mungon vendimi i arsyetuar i Gjykatës së Posaçme të Apelit, por është depozituar vendimi i Gjykatës së Shkallës së Parë dhe shkurtimi i vendimit, ku rezulton se, me vendimin e rekursuar, është lënë në fuqi vendimi i Gjykatës së Shkallës së Parë, si në lidhje me fajësinë, ashtu edhe me dënimin e caktuar për të kërkuesin Dh. A. B”, thuhet ndër të tjera në kërkesën e Salianjit.
Avokati thekson gjithashtu faktin se Salianji është deputet i Kuvendit të Shqipërisë, dhe si e tillë “deklaratat e tij duhet të vlerësohen në funksion të përmbushjes së funksionit të tij politik dhe të lirisë së shprehjes të mbrojtura nga neni 10 i KEDNJ dhe Kushtetuta e RSH. Gjykata Europiane për të Drejtat e Njeriut në vendimmarrjen e saj, ka arsyetuar se procedimi penal përbën ndërhyrje në lirinë e këtyre subjekteve për t’u shprehur, duke arritur në përfundimin se për një politikan, person publik të zgjedhur, liria e shprehjes është veçanërisht e rëndësishme dhe do të duheshin argumente tepër të fortë për të justifikuar ndërhyrjen në të drejtën e tyre për lirinë e shprehjes dhe vlerësimit ndaj tyre, si qëndrime në lidhje me fakte apo si gjykime vlerësuese”.
