Vlogeri Nuseir Yasin ka qenë disa ditë më parë në Shqipëri për të bërë video promovuese. I njohur si Nas Daily në rrjetet sociale, ai publikon çdo ditë video një minutëshe. Në këto video Nas shfaqet në vende të ndryshme ku tregon përshtypjen e tij për vendin që viziton.
Gjatë eksperiencës së tij në Shqipëri, ai pati shancin të bëhej pjesë e emisionit “Xing me Ermalin”. Vlogeri izraelito-arab erdhi në studio i shoqëruar nga e dashura e tij, Aline. Së bashku me ta ishte edhe drejtuesi i fondacionit Fundjavë Ndryshe, Arbër Hajdari, i cili bëri të mundur ardhjen e Nas në Shqipëri.
Çdo gjë po shkonte më së miri deri sa erdhi rradha te pyetja e Kejvinës. Roli i bukuroshes në emision është të bëjë një pyetje provokuese për të gjithë të ftuarit.
“Ti udhëton shpesh, por kur e gjen kohën për të dashurën tënde?,” e pyet Kejvina vlogerin. Në këtë moment Ermali e ndërpret, duke i thënë se nuk ishte kjo pyetja. Pyetja origjinale duhej të ishte “Këto udhëtime i bën për të takuar vajza?” Kejvina përgjigjet se pyetjen ia ndryshoi Arbri. “Është pa sens duke qenë se Nas udhëton gjithë kohës me të dashurën,” mësohet t’i ketë thënë Hajdari.
Por pa patur mundësinë të kthente përgjigje Nas, e dashura e tij u ndje e ofenduar dhe filloi të përlotej.
– Jam e lodhur dhe e mërzitur nga kjo gjë. Në rrjetet e mia sociale me miliona ndjekës jam e fokusuar te të drejtat e femrave dhe ti bën këtë pyetje?
– Aline, pyetja nuk ishte për ty, ishte për Nas, -i përgjigjet Ermali.
– Është një pyetje e pavend, – këmbëngul Aline, – në Shqipëri është më keq akoma, ju i trajtoni femrat si m*t, si objekte. Është ofenduese për mua.
– Aline, tani je ti ajo që po na ofendon neve, – thotë Ermali.
– Nuk po ju ofendoj, thjesht po shpjegoj që është e pavend, – i kthehet Aline e përlotur.
Në këtë moment Arbër Hajdari ndërhyn duke thënë “A mund të bëjmë një pyetje tjetër?,” gjë të cilën e aprovon edhe Ermali, duke pranuar se pyetja ishte “idiote”./Opinion.al
