Anisa Gjini/ Kantautori shqiptar Ermal Meta mbylli turin e tij prej tre vitesh me një koncert në ditëlindjen e tij, më 20 Prill në “Forum di Assago” në Milano. Ai ka vendosur t’i japë vetes një pushim të gjatë dy-vjeçar, për të përgatitur rikthimin me më shumë energji.
Tre vite më parë, Ermal Meta u ngjit në skenën e Sanremos me “Odio le favole”, më pas me “Vietato Morire”, kënga e cila e bëri të famshëm edhe në Shqipëri, e një vit më vonë erdhi fitorja e vendit të parë së bashku me Fabriozio Moro-n dhe pjesëmarrja në Eurovizion me “Non mi avete fatto niente”.
Kanë qenë këto tre vite të mbushur me koncerte, turne në teatro, e shumë fitore e çmime, disqe ari dhe platini, sikur të ishim duke folur për një dekadë dhe jo për tre vite. Kështu në ditëlindjen e tij, Ermali vendosi të thotë “lamtumirën” dhe falenderimet e tij me mënyrën më të mirë që ai di: me muzikë.
Midis lazerave dhe një Ledscreen gjigand, banderolave, tullumbaceve të mëdha në skenë, fletëve të cilat lexonin një fjalë të vetme “FALEMINDERIT”, ishin këngët dhe zëri i Ermalit bashkuar me atë të 13 mijë personave të pranishëm në “Forum Forum di Assago”.
Ishte ky një koncert i cili do të mbahet mend gjatë nga të gjithë pjesëmarrësit, e sidomos nga ujqërit e Ermalit, siç quhen fansat e tij, të cilët nuk e lanë vetëm në asnjë prej këngëve, plot 30 prej tyre. Këtij koncerti iu bashkuan dhe fansat shqiptarë, të cilët udhëtuan nga Shqipëria për ta ndjekur nga afër, për të festuar bashkë me të dhe për t’i thënë mirupafshim kantautorit të tyre të preferuar.
Tani nuk ngelet veçse të presim për albumin e tij të ri, i cili padyshim do të korrë sukses në Itali por dhe në Shqipëri, vendin e tij të origjinës./Autorja e këtij shkrimi ka qenë e pranishme në koncertin e Ermal Metës në Milano dhe ka shkruar këtë artikull për Opinion.al
