Kryebashkiaku Erion Veliaj është njohur për një marrëdhënie të mirë me LSI dhe me ish-kryetarin e saj, Ilir Meta. Tashmë duket se këto marrëdhënie nuk ekzistojnë më… Të paktën këtë la të kuptohet Veliaj në studion e ABCNEWS ku të gjitha foljet i vendosi të kohën e shkuar…
Teksa komentoi mbledhjen e fundit të këshillit bashkiak ku LSI bojkotoi rritjen e çmimit të ujit, Veliaj u shpeh:
“Unë kam pasur një marrëdhënie shumë të mirë me LSI. Duhet të pranoj se me z. Meta kam pasur një marrëdhënie jashtëzakonisht korrekte, nuk kam asnjë kompleks që ta them këtë , pavarësisht se si shkuan gjërat politike në fushatë.
Diçka ndryshoi me ikjen e Ilir Metës në Presidencë. Dhe duhet ta them këtë apriori, unë e mirëkuptoj”, u shpreh kryebashkiaku Erion Veliaj që mori këtë detyrë dy vite me parë me votat e PS por dhe të LSI-së.
Sakaq ai ka gjetur një fjalë nga mekanika për të përshkruar atë që po ndodh me LSI-në. “Një parti që në një muaj ndërroi tre kryetarë, pra Ilir Metën, Petrit Vasilin, Monika Kryemadhin, sigurisht që merr kohë që të axhustohet”, u shpreh ai duke vijuar më tej: “Ia dedikoj këtë lapsus, këtë keqkuptim, axhustimit të një partie që në një muaj ndërroi tre kryetarë”, tha Veliaj.
Por fjala axhustim që ai përdori për të përshkruar LSI ka një përdorim të pakët në Shqipëri aq më pak në termat politik. Axhustim është fjalë teknike që përdoret kryesisht nga mekanikët. /R.D-Opinion.al
Shpjegim nga fjalori:
AXHUSTERI f. tek.
1. Punime mekanike të lëmimit etj., që u bëhen me dorë veglave e pjesëve të makinave e të pajisjeve, në mënyrë që të vihen mirë në vendin e vet; puna e axhustatorit. Punë axhusterie. Reparti i axhusterisë.
2. Degë e mekanikës që merret me njohuritë për lëmimin e përpunimin me dorë të veglave dhe të pjesëve të makinave e të pajisjeve. Libri i axhusterisë.
