Moti i keq e kryesisht era e fortë kanë shkaktuar një situatë të pazakontë në disa qarqe të vendit. Për këtë ka reaguar edhe Ministria e Mbrojtjes e cila u ka bërë thirrje qytetarëve të të shmangin qëndrimet në afërsi të pallateve, godinave të larta, pemëve dhe objekteve të rrezikshme.
Në reagimin e Ministrisë thuhet se situata për momentin është nën kontroll dhe se ministrja Xhaçka është në komunikim të vazhdueshëm me shtabet e emergjencave.
Reagimi i Plotë i Ministrisë së Mbrojtjes
Ministria e Mbrojtjes, përmes Agjencisë Kombëtare të Mbrojtjes Civile, nisur nga situata e pazakontë e erës së fortë gjatë orëve të fundit në disa qarqe të vendit, i bën thirrje qytetarëve, të shmangin qëndrimet në afersi të pallateve, godinave të larta, pemëve dhe objekteve të rrezikshme. Rënia e sendeve dhe objekteve të ndryshme për shkak të erës përherë e më të fortë, mund të bëhen shkak për aksidente.
Ndërkohë, Ministrja Xhacka përmes AKMC është në komunikim të vazhdueshëm me shtabet e emergjencave në të gjitha prefekturat, për të ndjekur orë pas orë situatën e vështirë të motit të shkaktuar nga erërat dhe bora në disa qarqe. Sipas informacioneve paraprake të deritanishme situata është nën kontroll dhe nuk raportohen probleme. /Opinion.al
