“Duhet të gjejmë të gjallët…!” Më këtë mendim, ekipet e shpëtimit kanë vijuar pa u ndalur kërkimet në godinat e rrafshuara nga tërmetet të së hënës, në Turqi dhe Siri. Bilanci i viktimave i ka tejkaluar 11 mijë; gati 8600 mijë trupa që janë gjetur nën rrënoja në Turqi, ndërsa në Siri numërohen mbi 2600 të vdekur.
Në Turqi, shumë njerëz kaluan një tjetër natë në rrugë e makina, me shumë prej tyre që ankohen për reagimin e ngadaltë të Autoritetit për Menaxhimin e Emergjencave dhe Katastrofave.
“Shtëpia jonë u zhduk. Kemi fjetur përdhe, në shi. Nuk kemi marrë asnjë ndihmë; as çaj të ngrohtë për të pirë madje. Zoti na ndihmoftë”.
Presidenti Rexhep Taip Erdogan vizitoi të mërkurën zonat e prekura ndërsa në vend, rritet zemërimi për atë që po perceptohet si dështim i qeverisë për t’u përgatitur e për të reaguar ndaj kërcënimeve të tilla. Shumë qytetarë rrëfejnë se kanë gërmuar vetë me duar për të shpëtuar familjarët e bllokuar në rrënoja, ndërsa ekipit e kërkim-shpëtimit nuk kanë arritur dot në të gjitha zonat e prekura.
Erdogan pranoi se ka pasur vështirësi në reagimin fillestar, por fajësoi për vonesat rrugët dhe aeroportet e dëmtuara.
“Të gjitha institucionet shtetërore janë angazhuar. Ditën e parë, përjetuam disa problematika por tani e kemi situatën nën kontroll”, u shpreh presidenti turk.
Situata është veçanërisht shqetësuese në Siri, ku nevojat humanitare ishin tepër të larta edhe para tërmetit, pas konfliktit 12-vjecar që ka gjunjëzuar vendin…
25-vjecari nga Alepo, Jusuf, thotë se kishte dëgjuar zërin e familjarëve të tij nën rrënoja, por askush nuk i kishte nxjerrë prej andej.
“Kam folur me ta, ua kam dëgjuar zërin; por fatkeqësisht siç mund të shihni punimet janë shumë te ngadalta dhe nuk ka shumë pajisje”.
Me emocion dhe brohorima sakaq, u shoqërua momenti kur një familje e tërë u nxor e gjallë nga rrënojat e një pallati të shembur në Bisina të Sirisë.
