Presidenti i Turqisë, Erdogan, tha se vrasja e udhëheqësit të grupit militant Shteti Islamik, Abu Bakr al-Baghdadi, është një “pikë kthese” në luftën kundër terrorizmit.
“Vrasja e udhëheqësit të Daesh-it shënon një pikë kthese në luftën tonë të përbashkët kundër terrorizmit”, tha Erdogan në Twitter, duke përdorur një emër tjetër për Shtetin Islamik.
Erdogan tha gjithashtu se Turqia “do të vazhdojë t’i mbështesë përpjekjet anti-terroriste, ashtu siç ka bërë edhe në të kaluarën”.
“Jam i sigurt se lufta vendimtare kundër terrorizmit, në përputhje me frymën e aleancës, do të sjellë paqe për gjithë njerëzimin”, tha ai.
Ndërkaq Ministria e Mbrojtjes e Turqisë deklaroi se “ka pasur koordinim dhe shkëmbim të informacioneve” me Shtetet e Bashkuara, para operacionit për vrasjen e Al-Baghdadit, një nga terroristët më të kërkuar në botë.
Kujtojmë se presidenti i Shteteve të Bashkuara, Donald Trump, njoftoi të dielën për vrasjen e Al-Baghdadit, në një sulm të forcave amerikane në fshatin Barisha të provincës Idlib, në veriperëndim të Sirisë./Opinion.al
