Presidenti i Turqisë Rexhep Tajip Erdogan kërkoi të dielën presion ndaj Shteteve të Bashkuara të Amerikës për ndalur operacionet ushtarake të Izraelit në Gaza. Ai theksoi se nuk do të ketë marrëveshje pasi Uashingtoni nuk e konsideron këtë enklavë si territor palestinez.
“Ne duhet të flasim me Egjiptin dhe vendet e Gjirit dhe të bëjmë presion mbi Shtetet e Bashkuara,” u tha Erdogan gazetarëve turq në bordin e avionit të tij nga një samit i vendeve arabe dhe myslimane të mbajtur të shtunën në Riad të Arabisë Saudite.
“SHBA duhet të rrisë presionin ndaj Izraelit. Perëndimi duhet të intensifikojë presionin e tij ndaj Izraelit. Është jetike për ne që të arrijmë një armëpushim. Vendi më i rëndësishëm që duhet të përfshihet është SHBA, e cila ka ndikim mbi Izraelin,” këmbënguli Erdogan. Presidenti turk, megjithatë, sqaroi se nuk ka ndërmend të kontaktojë me homologun e tij amerikan, Joe Biden.
“Ne nuk mund të pajtohemi me zotin Biden nëse ai e konsideron Gazën si tokën e kolonëve ose Izraelit dhe jo tokën e popullit palestinez,” tha ai.
“Bashkimi Evropian beson saktësisht njësoj si Izraeli kur bëhet fjalë për Hamasin. Por ne nuk mendojmë si ata. Unë e konsideroj Hamasin një parti politike që fitoi zgjedhjet në Palestinë. Unë nuk i shoh gjërat njësoj si ata,” shtoi Erdogan./Opinion.al
