Turqia ka qenë armik i Kosovës në kohën e pushtimit dhe konsiderohet që po vazhdon përpjekjet e saj për të shtrirë interesat e vetë në Kosovë. Kështu ka thënë eksperti i sigurisë, Fadil Kajtazi në një debat në Rubikon të KTV-së ku u diskutua për puçin ushtarak në Turqi dhe zhvillimet pas tij.
Ai ka thënë se Kosova ka nevojë më shumë për zhvillim ekonomik e arsimor dhe më pak për ndërtim të xhamive, transmeton Koha.net.
“Vetë Erdogani po synon t’i shtrijë interesat e veta në Kosovë përmes ndërtimit të xhamive, e Kosova ka nevojë për zhvillim ekonomik e arsim. Dështimj i puçit është fakti se ushtria nuk e organizoi atë. Ushtria turke është gardian i Kushtetutës turke. Erdogani ka dashtë ta heq ushtrinë nga loja dhe pas kësaj populli turk e sheh ushtrinë si armik”, ka thënë ai.
Ai ka thënë se Turqia nuk ka qenë asnjëherë kundër Kosovës, përkundrazi siç tha ai Turqia në krye me Erdoganin dhe SHBA-të janë aleati kryesor i Kosovës.
“Nuk konsideroj që Turqia ka qenë kundër Kosovës, përkundrazi Turqia në krye me Erdoganin bashkë me SHBA-të janë aleati kryesor i Kosovës. Këta që flasin kundër Erdoganit, edhe shtatë jeta t’i kenë, s’mund të bëjnë sa ka bërë Erdogani”, ka thënë Kelmendi.
Opinionisti, Dardan Gashi ka thënë se puçi i cili vazhdon të ndodh sot në Turqi, ka filluar kohë më parë, duke ju referuar arrestimeve e protestave të mëhershme.
“Erdogani është diktator i cili shkel të drejtat e popullit të vetë”, ka thënë Gashi.
Mirëpo, tërësisht jo i besueshëm dhe joserioz shihet ky puç nga eksperti i sigurisë, Agim Musliu.
“Një ushtri siç është ajo e Turqisë nuk e bën puçin ushtarak kësisoj, nëse do të ishte real atëherë do të zgjaste me muaj deri në ardhjen e qeverisë së re”, ka thënë Musliu.
Sipas tij, asnjë njësi elitare e ushtrisë nuk ka marrë pjesë gjatë puçit pasi, siç thotë ai, ka qenë një fraksion ushtarak të cilit i ka munguar serioziteti.
