Presidenti i Turqisë, Recep Tayyip Erdogan ka përshëndetur referendumin e së dielës, ende pa dalë zyrtarisht rezultatet. Ai është shprehur se një shumicë e qartë e turqve kanë votuar për ndryshime kushtetuese në vend, gjatë fjalës së mbajtur para një grupi mbështetësish në Stamboll, pas shpalljes së fitores në referendum, teksa numërimi i votave po shkonte drejt përfundimit.
Erdogan ka deklaruar se Turqia ka marrë një vendim historik. Presidenti turk ka thënë se vendi do t’i nënshtrohet një prej reformave më të rëndësishme në historinë e tij.
Ndryshimeve kushtetuese – që do t’i rrisin kompetencat e Erdoganit – i kanë thënë ‘Po” 51.35 për qind e turqve, ndërsa “Jo” kanë thënë 48.65 për qind, duke e kthyer Turqinë nga një vend parlamentar në një shtet presidencial.
Mbështetësit e Erdoganit thonë se zëvendësimi i sistemit parlamentar me presidencë ekzekutive do të modernizojë Turqinë, ndërsa dy partitë kryesore opozitare po i kundërshtojnë rezultatet, duke u ankuar për manipulime të shumta.
Me miratimin e ndryshimeve kushtetuese, Erdogan mund të mbetet në pushtet në Turqi deri më 2029.
