Presidenti turk, Recep Tayyip Erdogan ka renditur presidentin amerikan, Donald Trump dhe atë rus, Vladimir Putin në mesin e liderëve që admiron më shumë, teksa ka thënë se Evropës i mungon një lider frymëzues.
Duke folur para studentëve në kryeqytetin turk, Ankara, Erdogan ka thënë se Evropa po përballet me “krizë serioze të udhëheqjes”.
Ai ka përshendetur Trumpin për natyrën e tij të hapur.
“Pavarësisht se e pëlqeni apo jo, Trump është një emër i rëndësishëm. Ai nuk ka axhendë të fshehur. Ai diskuton me mua hapur dhe unë flas me të shumë hapur”, -ka thënë presidenti turk.
Në mënyrë të ngjashme Erdogan ka përshkruar edhe Putinin, duke thënë se as ai nuk ka “axhendë të fshehur”.
Lideri i tretë i përmendur nga udhëheqësi turk, ka qenë sheiku i Katarit, Tamim bin Hamad Al Thani për të cilin Erdogan ka thënë se është “lider i ri dhe dinamik”, i cili mbështet shtetet e varfëra.
Më parë Erdogan ka përmendur Profetin Muhamed dhe themeluesin e Turqisë moderne, Mustafa Kemal Ataturk në mesin e personaliteteve frymëzuese për të./Opinion.al/
