Pas takimit në Athinë me kryeministrin grek, Kyriakos Mitsotakis, presidenti turk, Rexhep Tajip Erdogan ka deklaruar se nuk ka asnjë çështje midis Turqisëdhe Greqisë që nuk mund të zgjidhet.
“Është shpresa jonë për të zgjidhur çështjet tona nëpërmjet dialogut konstruktiv dhe marrëdhënieve të fqinjësisë së mirë në kuadër të kornizës së ligjit ndërkombëtar”, tha presidenti Erdogan në konferencën e përbashkët për media me kryeministrin Mitsotakis.
“Do të jetë në interes të të gjithë rajonit që të arrihet një zgjidhje e drejtë, e përhershme dhe e qëndrueshme për çështjen e Qipros mbi bazën e realiteteve në ishull”, theksoi presidenti turk.
Sipas mediave të huaja, ai theksoi se duan të kthejnë Egjeun në një det paqeje dhe bashkëpunimi.
“Ne aspirojmë të japim shembull për botën me hapat e përbashkëta që do të bëjmë si Turqi dhe Greqi”, tha ai.
Lidhur me takimin me kryeministrin grek, Erdogan tha se të dyja palët shkëmbyen mendime për qëndrimet e tyre në lidhje me Egjeun dhe Mesdheun Lindor.
“Ne u kemi kërkuar ministrave tanë të jashtëm të diskutojnë çështjet e lidhura me këtë”, shtoi ai.
Erdogan foli edhe për luftën e Izraelit në Rripin e Gazës, ku nga sulmet e pamëshirshme izraelite që nga 7 tetori janë vrarë të paktën 16.248 palestinezë dhe më shumë se 43.616 të tjerë janë plagosur.
