Vijon të jetë e tensionuar situata mes Turqisë dhe Greqisë. Presidenti i Turqisë Erdogan akuzoi Greqinë për pushtimin e ishujve të Egjeut që kanë status të çmilitarizuar dhe kërcënoi se Turqia do të bëjë atë që është e nevojshme kur të vijë momenti.
Rivalët historikë, që njëkohësisht janë edhe anëtarë të NATO-s, kanë mosmarrëveshje për statusin e ishujve në Detin Egje, kufijtë detarë, burimet hidrokarbure në Mesdhe, si dhe për Qipron që është e ndarë etnikisht.
Kohët e fundit Ankaraja e ka akuzuar Athinën se ka armatosur ishujt në Egje që kanë status të çmilitarizuar. Por Greqia e ka kundërshtuar këtë pretendim.
“Kur të jetë momenti ne do të bëjmë atë që e nevojshme”, tha sot Erdogan duke folur për ishujt në Egje.
Në deklaratën e tij, Presidenti i Turqisë Erdogan i tha Greqisë që të kujtojë Izmirin, duke iu referuar fitores turke ndaj forcave greke.
Pas këtyre deklaratave kërcënuese reagoi Greqia, duke thënë se do të informojë vendet aleate.
“Ne do të njoftojmë aleatët dhe partnerët tanë për përmbajtjen e këtyre deklaratave provokuese për ta bërë të qartë se kush po mundohet të prishë kohezionin e aleancës sonë gjatë një periudhe të rrezikshme”, tha Ministria e Jashtme greke përmes një deklarate.
Ankaraja thotë se ishujt e Egjeut iu dhanë Greqisë sipas traktateve të viteve 1923 dhe 1947 me kusht që të mos i armatosë. Ministri i Jashtëm turk, Çavusoglu, ka thënë më herët se Turqia do të vendosë në dyshim sovranitetin grek mbi ishujt e Egjeut nëse Greqia vazhdon armatosjen e tyre.
